စဉ့်ကိုင်မြို့နယ် ဒေသကာကွယ်ရေးတပ်ဖွဲ့ဝင် ရဲဘော်လေးဦး အလုပ်ကိစ္စဖြင့် ခရီးသွားစဥ် စစ်ကောင်စီတပ်နှင့် ထိပ်တိုက်တွေ့ကာ ရဲဘော် သုံးဦးဖမ်းဆီးသတ်ဖြတ်ခံလိုက်ရကြောင်း LPDF(Sintgaing)က ယနေ့(သြဂုတ် ၁၆)တွင် အသိပေးထုတ်ပြန်သည်။
သြဂုတ် ၁၃ ရက်က စဥ့်ကိုင်မှတဆင့် ရွာငံဘက်သို့ ခရီးသွားစဥ် စစ်ကောင်စီတပ်စစ်ကြောင်းနှင့် ထိပ်တိုက်တွေ့ခဲ့ခြင်းဖြစ်ပြီး ရဲဘော်လေးဦးအနက် သုံးဦးကို နေရာတင် ပစ်သတ်သွားခြင်းဖြစ်ကြောင်း ထုတ်ပြန်ချက်တွင် ဖော်ပြ သည်။
“ဖြစ်တာက ရွာငံနယ် တဲလုရွာနားမှာ ဖြစ်သွားတာ။ ကျွန် တော်တို့လည်း ဖြစ်ဖြစ်ချင်း မသိရသေးဘူး။ စကစဝါဒဖြန့် page တစ်ခုတင်လာလို့ ပုံတွေကြည့်လိုက်တော့မှ ကိုယ့်လူတွေဆိုတာ သိရတာ”ဟု LPDF (Sintgaing)မှ ရဲဘော်တစ်ဦးက ပြောသည်။
အဆိုပါရဲဘော်လေးဦးသည် စစ်ကောင်စီတပ် အား ရှောင်ကွင်းသွားလာရန် အခြေအနေမပေးသည့်အတွက် ထိပ်တိုက်တွေ့ဆုံခဲ့ခြင်းဖြစ်ပြီး ပြန်လည်ခုခံပစ်ခတ်ရန် အဆင်မပြေဘဲ ဝိုင်းဝန်းပိတ်ဆို့ဖမ်းဆီးခံရခြင်းဖြစ်ပြီး သုံးဦးကို ပစ်သတ်ကာ ကျန်ရဲဘော်တစ်ဦးအား အရှင်ဖမ်းဆီးသွားကြောင်း ဖော်ပြသည်။
ဖမ်းဆီးသတ်ဖြတ်ခံလိုက်ရသော အထက်ပါရဲဘော်လေးဦးအနက် သုံးဦးမှာ စဥ့်ကိုင် LPDF ၏မဟာမိတ် Black Brothers PDF မှ သုံးဦးနှင့် စဥ့်ကိုင် LPDF မှ တစ်ဦး အသီးသီးဖြစ်ကြောင်း သိရသည်။
အထက်ပါဖြစ်စဥ်နှင့်ပတ်သက်ပြီး စစ်ကောင်စီတပ်ဝါဒဖြန့်မီဒီယာများ ဖော်ပြရာတွင် ရွာငံနယ် တဲလုကျေးရွာဘက်သို့ စစ်ကောင်စီတပ် အင်အား (၇၀)ကျော်ဖြင့် စစ်ကြောင်းထိုးစဥ် ယာတဲတစ်လုံး၎င်း၌ PDF ရဲဘော်များကို တွေ့ရှိဖမ်းဆီးခဲ့ခြင်းဖြစ်သည်ဟု ဆိုသည်။
