ဖမ်းဆီးထားတဲ့ ဂျပန်နိုင်ငံသား လူငယ်ဒါရိုက်တာ တိုရုကူဘိုတာကို ပြန်လွှတ်ပေးဖို့တောင်းဆိုတာတွေနဲ့ပတ်သက်ပြီး တရားရုံးရဲ့အမိန့်ချတာကို စောင့်ကြည့်ဦးမယ် လို့ စစ်ကောင်စီ ဘက်က ဒီနေ့ညနေပိုင်းမှာ သတင်းထုတ်လာပါတယ်။
ပြီးခဲ့တဲ့ ဇူလိုင်လ ၃၀ ရက်က ရန်ကုန်တိုင်း ၊တောင်ဒဂုံ မြို့နယ်ထဲမှာ ဂျပန်နိုင်ငံသား တိုရုကူဘိုတာကို စစ်ကောင်စီက ဖမ်းဆီးခဲ့တာပါ။
တိုရုကူဘိုတာဟာ စစ်အာဏာသိမ်းတာကိုဆန့်ကျင်တဲ့ ဆန္ဒပြပွဲမှာပါဝင်တယ်ဆိုတဲ့စွပ်စွဲချက်နဲ့ ရာဇသတ်ကြီးပုဒ်မ ၅၀၅ (က) အပြင် ဗီဇာစည်းကမ်းချိုးဖောက်မှုတွေနဲ့ပါ စစ်ကောင်စီက တရားစွဲဆိုထားတာဖြစ်ပါတယ်။
တိုရုကူဘိုတာဟာ တောင်ဒဂုံမြို့နယ် ဆန္ဒပြပွဲတစ်ခုမှာ ရုပ်သံမှတ်တမ်းတင်နေချိန် ဆန္ဒပြသူတွေနဲ့အတူ ဖမ်းခံရတာလည်းဖြစ်ပါတယ်။
ဖမ်းဆီးထားတဲ့ တိုရုကူဘိုတာကို ပြန်လွှတ်ပေးဖို့ ဂျပန်အစိုးရက တောင်းဆိုထားပါတယ်။
ဒါအပြင် ပြီးခဲ့တဲ့ ရက်ပိုင်းက ဂျပန်လွှတ်တော်အမတ်တစ်ဦး မြန်မာနိုင်ငံကိုလာရောက်တဲ့ခရီးစဉ်အတွင်း စစ်ကောင်စီခေါင်းဆောင်နဲ့တွေ့ဆုံရာမှာ တိုရုကူဘိုတာလွတ်မြောက်ရေးအတွက် ဆွေးနွေးခဲ့တယ်လို့သိရပါတယ်။
စစ်တပ်အာဏာသိမ်း ကာစ ပြီးခဲ့တဲ့နှစ် ဖေဖော်ဝါရီလအတွင်း ဂျပန်သတင်းထောက် ယူကီ ကီတာဇုမိကို စစ်ကောင်စီက ဖမ်းဆီးခဲ့ပြီး လေးလအကြာမှာ ပြန်လွှတ်ပေးခဲ့တာရှိပါတယ်။
