မွန်ပြည်နယ်အပါအဝင် ဒေသအချို့၌ မိုးသည်းထန်စွာရွာသွန်းနေပြီး မော်လမြိုင် မြို့ မြေနိမ့်ရပ်ကွက်အချို့ ရေဘေးကြုံတွေ့နေသည်။
မွန်ပြည်နယ်နှင့် တနင်္သာရီတိုင်းအပါအဝင် ကမ်းရိုးတန်းဒေသများနှင့် မြန်မာနိုင်ငံအောက်ပိုင်း ဒေသများတွင် ပုံမှန်ထက် မိုးကောင်းနေသည်။ မော်လမြိုင်မြို့မှ ရွှေပြည်စိုးရပ်ကွက်တွင် မြေနိမ့်ပိုင်းနေရာများ ရေကြီးနစ်မြုပ်နေ၍ ဒေသခံအချို့ ယာယီ ရေဘေးကယ်ဆယ်ရေးစခန်းများ၌ သွားရောက်နေထိုင်ကြရသည်။
လက်ရှိကာလတွင် ထိုင်းနိုင်ငံဘက်မှ ဖြတ်ကျော်ဝင်ရောက်လာသည့် အရှေ့လေပွေလှိုင်း တစ်ခုကြောင့် မွန်ပြည်နယ်အပါအဝင် ကမ်းရိုးတန်းဒေသများ မိုးဆက်ကောင်းနိုင်ကြောင်း မိုးလေဝသဆိုင်ရာ ကွန်ပြူတာမော်ဒယ်တစ်ခုဖြစ်သော ECMWF တွင် ဖော်ပြထားသည်။
အမျိုးသားညီညွတ်ရေးအစိုးရ(NUG)၏ လူသားချင်းစာနာထောက်ထားရေးနှင့် ဘေးအန္တရာယ် စီမံခန့်ခွဲမှု ဆိုင်ရာဝန်ကြီးဌာနက ရေကြီးနစ်မြုပ်နိုင်သည့် အခြေအနေကို သတိပေးထားသည်။
သြဂုတ်လလယ်ကာလတွင် မုတ်သုံလေအားကောင်းစေမည့် လက္ခဏာဖြစ်သော မုတ်သုံမုန်တိုင်းငယ်တစ်ခု အိန္ဒိယနိုင်ငံအနောက်မြောက်ဘက်သို့ ရွေ့လျား အဆုံးသတ်နိုင်ခြင်း၊ နောက်ထပ် မုတ်သုံလေဖိအားနည်းဆဲလ်တစ်ခု ဘင်္ဂလားပင်လယ်အော်မြောက်ပိုင်းတွင် ထပ်မံဖြစ်ပေါ်လာ နိုင်ခြင်း၏ အကျိုးဆက်အဖြစ် မြန်မာနိုင်ငံတွင် မုတ်သုံလေ အားပြန်ကောင်းလာနိုင်ပြီး ကမ်းရိုးတန်းဒေသများတွင်မိုးသည်းထန်နိုင်ကြောင်း သတိပေးထားသည်။
အထူးသဖြင့် ရခိုင်ပြည်နယ်၊ ရန်ကုန်တိုင်း၊ မွန်ပြည်နယ်တို့တွင် နေရာကွက်၍ မိုးကြီးရေလျှံပြီး ရေကြီးမြေပြိုဘေးကြုံတွေ့နိုင်သည်ဟုလည်း သတိပေးသည်။ ထို့အပြင် ဧရာဝတီမြစ်၊ ချင်းတွင်းမြစ်၊ သံလွင်မြစ်များတွင် မြစ်ရေများ အနည်းငယ် ဆက်လက်မြင့်တက်လာနိုင်ပြီး ရေကြီးမှုဘေးအန္တရာယ်ကို သတိပြုရန် တိုက်တွန်းထားသည်။
