ရန်ကုန်၊ မန္တလေးအပါအဝင် တိုင်းနှင့်ပြည်နယ် ၅ ခုမှ နိုင်ငံပိုင်အဆောက်အဦးနှင့်မြေကွက် ၂၇ ခုကို အိတ်ဖွင့်တင်ဒါစနစ်ဖြင့်ရောင်းချမည်ဟုစစ်ကောင်စီက ယနေ့ထုတ်ပြန်သည်။
မြေကွက်များနှင့် အဆောက်အဦးများသည် ပဲခူး၊ မန္တလေး၊ ရန်ကုန်၊ ဧရာဝတီတိုင်းနှင့် ရှမ်းပြည်နယ်တို့မှ ဖြစ်သည်ဟု စစ်ကောင်စီ၏ ပုဂ္ဂလိကပိုင်ပြုလုပ်ရေးကော်မရှင်က ထုတ်ပြန်ထားသည့်စာရင်းတွင်တွေ့ရသည်။
ထိုမြေကွက်များနှင့်အဆောက်အဦးများတွင် ပဲခူးတိုင်းမှ ၄ခု၊ မန္တလေးမှ ၆ခု၊ ရန်ကုန်တိုင်း ၅ခု ၊ ဧရာဝတီတိုင်း ၁ခုနှင့်ရှမ်းပြည်နယ်မှ ၁၁ခုပါဝင်သည်။
ရန်ကုန်မြို့တွင် သင်္ဃန်းကျွန်းမြို့နယ်၊ တောင်ဥက္ကလာပမြို့နယ်၊ မင်္ဂလာတောင်ညွန့်မြို့နယ်တို့မှ မြေကွက်များနှင့် မရမ်းကုန်းနှင့် ကျောက်တံတားမြို့နယ်ရှိတိုက်ခန်းများပါဝင်သည်။
အဆိုပါမြေကွက်နှင့် တိုက်ခန်းများကို ဩဂုတ် ၁၉ ရက်မှ စက်တင်ဘာ ၂ ရက်အထိ အဆိုပြုတင်သွင်း၍ ဝယ်ယူနိုင်သည်ဟု စစ်ကောင်စီကဆိုသည်။
စစ်တပ်အာဏာသိမ်းပြီးချိန်မှစပြီးစစ်အုပ်စုနှင့်နီးစပ်သူများသာ ထိုသို့သော တင်ဒါလုပ်ငန်းများကို လက်ဝါးကြီးအုပ်ထားပြီး ဈေးပြိုင်တင်ဒါစနစ်ဆိုမှာလည်း ဟန်ပြသာဖြစ်ကြောင်း တင်ဒါလုပ်ငန်းဆောင်ရွက်နေသည့် လုပ်ငန်းရှင်တစ်ဦးကမှတ်ချက်ပေးသည်။
တင်ဒါများတွင် စစ်တပ်နှင့်နီးစပ်သူများ ၊စစ်တပ်ထောက်ခံသူများလုပ်နေသော ကုမ္ပဏီနှင့်လုပ်ငန်းများသာလုပ်ကိုင်ခွင့်ရနေကြောင်း လုပ်ငန်းရှင်အချို့ကပြောသည်။
