စစ်ကိုင်းတိုင်း ကသာမြို့မှ ဗန်းမော်မြို့ဘက်သို့ မြစ်ကြောင်းအတိုင်း အထက်သို့ဆန်တက်လာသော စစ်ကောင်စီတပ်ရေယာဥ်အုပ်စုကို လမ်းခုလတ်တစ်နေရာတွင် စောင့်ကြိုတိုက်ခိုက်ခဲ့ကြောင်း မြို့လှ KPDFက ယနေ့(သြဂုတ် ၁၈)တွင် ထုတ်ပြန်သည်။
ယနေ့နံနက် ၁၁ နာရီခွဲခန့်တွင် စစ်ကောင်စီတပ်၏ ရိက္ခာတင်သင်္ဘောနှင့် သံခွန်များအား မြို့လှ KPDFတပ်ခွဲ ဗိုလ်မိုးကြိုးဦးဆောင်သောအဖွဲ့က Mytel – မမ ရှေ့ ထွက်မိုင်း (၁၂)လုံးဖြင့် ဖောက်ခွဲတိုက်ခိုက်ခဲ့ရာ သံခွန်နှင့် သဘော်ကိုယ်ထည်များအား ထိမှန်ခဲ့ကြောင်း ဖော်ပြသည်။
“စကစဘက်မှ သင်္ဘောလုံခြုံရေးအတွက် ရဟတ် ယာဥ်တစ်စီးနှင့် ဂျက်တိုက်လေယာဥ်တစ်စီးတို့ အသုံးပြုခဲ့ပြီး ၎င်းတို့၏ ကမ်းစောင့်တပ်နှင့် စစ်သင်္ဘောများပေါ်မှ မြစ်ကမ်းတလျောက် လက်နက်ကြီး လက်နက်ငယ်များဖြင့် အဆက်မပြတ် ရမ်းသမ်း ပစ်ခတ်ခဲ့သည်”ဟု မြို့လှ KPDF က ဆိုသည်။
အထက်ပါတိုက်ခိုက်မှုတွင် စစ်ကောင်စီဘက်မှ ထိခိုက် ကျဆုံးမှုရှိနိုင်ပြီး မြို့လှ KPDF တပ်ဖွဲ့များ အထိခိုက်မရှိဘဲ အသာစီးရယူနိုင်ခဲ့ကြောင်း အသိပေးသည်။
ကသာ၊ ရွှေကူနှင့် ဧရာဝတီမြစ်ကမ်းတလျှောက်ရှိ ရေကြောင်းရုံး ဝန်ထမ်းများအနေဖြင့် ရာထူး၊ တာဝန်များမှ နုတ်ထွက်ပေးကြရန်နှင့် လိုက်နာခြင်းမရှိပါက မြို့လှ KPDF အနေဖြင့် တစုံတရာ အရေးယူမှုများ ပြုလုပ်ရန် စီစဥ်ထားကြောင်း ဝန်ထမ်းအမည်များနှင့်တကွ သတိပေးထုတ်ပြန်ထားသည်။
