စစ်ကိုင်တိုင်း ကသာမြို့နယ်မှ တက်လာသည့် စစ်ကောင်စီတပ်သင်္ဘောများကို မြန်မာနိုင်ငံလုံးဆိုင်ရာကျောင်သားများဒီမိုကရက်တစ်တပ်ဦး (ABSDF)နှင့် ဒေသခံ ပြည်သူ့ကာကွယ် ရေးတပ်များ ပူးပေါင်းတိုက်ခိုက်ခဲ့သည်ဟု ကသာပြည်သူ့ကာကွယ်ရေးအဖွဲ့(ပကဖ)က ထုတ်ပြန်သည်။
ယမန်နေ့(ဩဂုတ် ၁၈ရက်) နံနက် ၉နာရီခွဲတွင် စစ်ကောင်စီသင်္ဘော ၆စီးကို ABSDF မှ ဦးဆောင်၍ ကသာမြို့နယ် (ပကဖ)၊ ဒေသခံ LDF၊ ရပ်ကျေး ပကဖများ ပူးပေါင်းသည့် ကာကွယ်ရေးတပ်ပေါင်းစုများက စစ်ကောင်စီများ မထင်မှတ်သော နေရာမှ ပစ်ခတ်တိုက်ခိုက်ခဲ့ခြင်းဖြစ်သည်ဟုဆိုသည်။
Mytel လျော့တိုက်လက်လုပ် ဒုံး(၁၄)လုံးဖြင့် တိုက်ခိုက်ခဲ့ရာ (၉)လုံးထိထိမိမိအောင်မြင်ခဲ့ပြီး နောက်ဆုံး သင်္ဘောကို ချက်ကောင်းထိမှန်ခဲ့ကြောင်း ဖော်ပြထားသည်။
အဆိုပါ သင်္ဘောများကို စစ်ကောင်စီတပ်က လေကြောင်းမှ လုံခြုံရေး ယူပေးနေသည့် ကြားမှ အောင်မြင်စွာ ပစ်ခတ်နိုင်ခဲ့ခြင်းဖြစ်သည်ဟုထုတ်ပြန်သည်။
ကသာ တစ်မြို့နယ်လုံး အတိုင်းအတာအနဖြင့် ရပ်ကျေး ပကဖ များဖွဲ့စည်းထားပြီး အခြေခံစစ်ပညာ သင်တန်းအပါတ်စဉ်(၇)အထိပေးပြီးဖြစ်၍ ရပ်ကျေးတိုင်း တွင် PDF/မဟာမိတ်များနှင့် တိုက်ပွဲဝင်နေပြီ ဖြစ်ကြောင်း ကသာပကဖက အသိပေးထားပြီး မြို့နယ်သူ/သား များအနေဖြင့် ရဲဘော်များကို လိုအပ်သည့် အကူအညီများ ကူညီပေးကြရန် မေတ္တာရပ်ခံထားသည်။
ကသာမှ ဗန်းမော်မြို့သို့ဆန်တက်လာသည့် စစ်ကောင်စီ ရေယာဉ်အုပ်စုကို မြို့လှ PDFက လည်း ယမန်နေ့ နံနက် ၁၁နာရီခန့်တွင် လမ်းခုလတ်တစ်နေရာက စောင့်ကြိုတိုက်ခိုက်ခဲ့ရာ စစ်ကောင်စီ သင်္ဘောများ ထိမှန်ခဲ့သည်ဟု မြို့လှ PDFက ထုတ်ပြန်ထားသည်။
