စစ်ကိုင်းတိုင်း၊ ချောင်းဦးမြို့နယ် မုံရွာ – မန္တလေးလမ်းမကြီးပေါ်တွင် စစ်ကောင်စီတပ်၏ မိုင်းရှာအဖွဲ့နှင့် ခြိမ်းခြောက်ငွေတောင်းနေသည့်အဖွဲ့အား မိုင်းခွဲတိုက်ခိုက်ရာ ထိခိုက်သေဆုံးမှုများရှိကြောင်း ချောင်းဦး PDFအဖွဲ့က ထုတ်ပြန်သည်။
ယမန်နေ့ (သြဂုတ် ၁၈ ရက်) နံနက်ပိုင်းက ချောင်းဦးမြို့တွင်း မုံရွာ-မန္တလေးကားလမ်းပေါ်တွင် PDFအဖွဲ့ထောင်ထားသောမိုင်းပေါ်တွင် စစ်ကောင်စီတပ်သား ၁၈ဦးက လမ်းသွား၊ လမ်းလာများအား စစ်ဆေးငွေညှစ်တောင်းခံခဲ့သည်။
ထိုအချိန် CHU PDF တပ်ခွဲ (၃)၏ ရဲဘော်များက အဆိုပါ မိုင်းများခွဲတိုက်ခိုက်ခဲ့ရာ အကြမ်းဖက်စစ်သား ၆ ဦး သေဆုံး၍ လေးဦးထိခိုက်ဒဏ်ရာ ရရှိသွားကြောင်း ချောင်းဦး PDFက အသိပေးသည်။
ယမန်နေ့ နံနက်အစောပိုင်းကပင် စစ်ကောင်စီတပ်သည် မုံရွာမြို့မှထွက်ခွာလာပြီး ခင်မွန်ကျေးရွာရှိ (နမခ)ဘက်စုံခြံတွင် ခေတ္တနားခဲ့သည်။
မွန်းလွဲပိုင်းတွင် စစ်ကောင်စီတပ်က အင်အား ၅၀ခန့်ဖြင့် ဘက်စုံခြံတောင်ဘက်၊ မုံရွာ-မန္တလေးလမ်းအနောက်ဘက်၊ လယ်ကွင်းများအတိုင်း မိုင်းရှာထွက်စဥ် CHUPDF တပ်ခွဲ ၄(မိုင်းတပ်ခွဲ)က မိုင်းခွဲတိုက်ခိုက်ခဲ့ရာ ငါးဦးသေဆုံး၍ ထိခိုက်သူများပြားကြောင်း ချောင်းဦးPDF၏ ထုတ်ပြန်ချက်တွင် ဖော်ပြသည်။
ထိုဖြစ်စဥ်အား ပြည်သူ့ကာကွယ်ရေးအဖွဲ့-ချောင်းဦးမြို့နယ်-(ပကဖ)၏ ဦးဆောင်မှုဖြင့် ပြုလုပ်ခဲ့ခြင်းဖြစ်ပြီး ရဲဘော်များအထိအခိုက်မရှိဟု ချောင်းဦး PDFက အသိပေးသည်။
ဖြစ်စဥ်နှင့်ပတ်သက်ပြီး ချောင်းဦးPDFအဖွဲ့ထံ ဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပေ။ ထိခိုက်သေဆုံးမှုအခြေအနေနှင့်ပတ်သက်၍ People’s Springက သီးခြားအတည်ပြုနိုင်ခြင်းမရှိသေးပေ။
