စစ်ကိုင်းတိုင်း၊ မြင်းမူမြို့နယ်အတွင်းရှိ ပြည်သူ့ကာကွယ်ရေးတပ်မှ ရဲဘော်နှစ်ဦး အကြမ်းဖက်စစ်ကောင်စီတပ်ကင်းပုန်းနှင့် ထိတွေ့မှုဖြစ်ပွားပြီး ကျဆုံးခဲ့သည်။
စစ်ကိုင်းခရိုင် တပ်ရင်း(၁)၊ တပ်ခွဲ- ၄၊ Zamani ၏ ရဲဘော်ဟောင်းတစ်ဦးဖြစ်သူ မျောက်ရှုံး(ခ)မိုးမင်းသိန်းနှင့် ငါးထောင့်ကြယ်အဖွဲ့၏ ရဲဘော်တစ်ဦးတို့သည် ဩဂုတ် ၁၈ရက် ညနေ ၅ နာရီခန့်တွင် စစ်ကောင်စီတပ်ကင်းပုန်းနှင့် ထိတွေ့မှုဖြစ်ပြီး ကျဆုံးသွားခြင်းဖြစ်ကြောင်း ဒေသတွင်းသတင်းရင်းမြစ်များက ပြောသည်။
“မြင်းမူမြို့ ဂွေးပင်တောအနီး ကင်းပုန်းဝပ်နေသော စကစတပ်သားများနှင့် ပစ္စည်းများသယ်ယူပို့ဆောင်လာသော ရဲဘော်များ ထိတွေ့မှုဖြစ်ပွားပြီး ကျဆုံးသွားခဲ့ရတာဖြစ်ပါတယ်။”ဟု Zamani Revolution Force/MMU Myaung တပ်ဖွဲ့က အသိပေးသည်။
ယင်းရဲဘော်နှစ်ဦးအား ယမန်နေ့(ဩဂုတ် ၁၉ ရက်) နံနက် ၁၁ နာရီအချိန်တွင် Zamani အဖွဲ့သားများနှင့် ပူးပေါင်းမဟာမိတ်အဖွဲ့များက အမိန့်ပြန်အခမ်းအနားနှင့်အတူ မီးသင်္ဂြိုလ်ခဲ့ကြောင်း Zamani Revolution Force/MMU Myaung တပ်ဖွဲ့က ထုတ်ပြန်အသိပေးထားသည်။
