မကွေးတိုင်း ဂန့်ဂေါမြို့နယ် နှမ်းခါးရွာသို့ စစ်ကောင်စီတပ်များရောက်ရှိနေပြီး မည်သည့် နေရာသို့ စစ်ကြောင်းထိုးမည်ကို ခန့်မှန်းမရသေးကြောင့် ပြည်သူများအနေဖြင့် သတိဝိရိယထား၍ ဘေးလွတ်ကင်း သောနေရာများတွင် ရှောင်တိမ်းနေထိုင်ကြရန် နှမ်းခါးရွာလူငယ်အဖွဲ့က ယနေ့ အသိပေး ကြေညာသည်။
စစ်ကောင်စီနှင့် ပျူစောထီး အင်အား ၁၅၀ခန့်ပါ စစ်ကြောင်းသည် ဩဂုတ် ၁၉ရက်တွင် ဂန့်ဂေါနယ် တောင်ခရန်ရွာ ရဲစခန်းမှနှမ်းခါးရွာသို့ စစ်ကြောင်းထိုးလာကြောင်း ဖော်ပြထားသည်။
![(နမ်းခါးကျေးရွာကို စစ်ကောင်စီတပ်က မီးရှို့ဖျက်ဆီးသွားသည်ကို ၂၀၂၁ စက်တင်ဘာ ၂၉ရက်က တွေ့ရစဥ်၊ ဓာတ်ပုံ - နမ်းခါးလူငယ်အဖွဲ့)](https://i0.wp.com/www.ludunwayoo.com/wp-content/uploads/2022/08/299148223_448354217354036_114735433935690646_n.png?resize=730%2C365&ssl=1)
ထိုသို့ စစ်ကြောင်းထိုးရာတွင် တောင်ခရန်ရွာ ရဲစခန်းအတွင်းမှ လက်နက်ကြီးများ ပစ်ကူပေးခြင်း ၊ နှမ်းခါးရွာ မြောက်ဘက်ရှိ တောရကျောင်း အတွင်းမှ စစ်ကောင်စီများကလည်း လက်နက်ကြီးများဖြင့် ပစ်ခတ်ခဲ့ပြီး စက်သေနတ်များ ဖြင့် ပစ်ခတ်ခြင်း ပြုလုပ်ပြီး နှမ်းခါးရွာသို့ ဝင်ရောက်တပ်စွဲ စခန်းချညအိပ်ခဲ့သည်ဟု ဆိုသည်။
![(နမ်းခါးကျေးရွာကို စစ်ကောင်စီတပ်က မီးရှို့ဖျက်ဆီးသွားသည်ကို ၂၀၂၁ စက်တင်ဘာ ၂၉ရက်က တွေ့ရစဥ်၊ ဓာတ်ပုံ - နမ်းခါးလူငယ်အဖွဲ့)](https://i0.wp.com/www.ludunwayoo.com/wp-content/uploads/2022/08/299189565_448354360687355_6846300962084842398_n.png?resize=730%2C365&ssl=1)
နှမ်းခါးရွာသို့ ရောက်နေသည့် စစ်ကောင်စီတပ်အနေဖြင့် မည်သည့်နေရာသို့ ဦးတည်မည်ကို မသိရ၍ နှမ်းခါး လူငယ်အဖွဲ့က ယခုကဲ့သို့ ပြည်သူလူထုအား အသိပေး တိုက်တွန်းခဲ့ခြင်းဖြစ်သည်။
စစ်ကောင်စီတပ်သည် ယခင်ကလည်း နှမ်းခါးရွာကို အကြိမ်ကြိမ် ဝင်ရောက်ခဲ့ပြီး ၃ကြိမ်ထက်မနည်း ကျေးရွာအတွင်းရှိ နေအိမ်များကို မီးရှို့ဖျက်ဆီးခဲ့၍ နေအိမ်အများအပြား မီးလောင်ပျက်စီးခဲ့ရသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)