အာဏာသိမ်းပြီးနောက် ရှားတောမြို့နယ်ရှိ စစ်ကောင်စီ ခြေကုပ်စခန်း ရှစ်ခုကို သိမ်းပိုက်ရရှိခဲ့ကြောင်း ကရင်နီတပ်မတော်အသိပေး
ကရင်နီတပ်မတော်(KA)၊ ကရင်နီအမျိုးသားများကာကွယ်ရေးတပ်(KNDF) ပူးပေါင်းတပ်၏ တိုက်ခိုက်မှုကြောင့် စစ်ကောင်စီတပ်များ အပြီးအပိုင်ဆုတ်ခွာသွားသည့် တငူးဆို တပ်စခန်းကို မီးရှို့ဖျက်ဆီးခဲ့ကြောင်း KA က ယနေ့ ထုတ်ပြန်သည်။
ကရင်နီပြည် ရှားတောမြို့နယ် အတွင်း ရှမ်း-ကယား နယ်စပ်ရှိ စစ်ကောင်စီ ခြေကုပ်စခန်း ပွိုင့်အမှတ် (၅၃၅၀) -ဒေသအခေါ် တငူးဆိုစခန်းကို KA၊ KNDF တပ်ရင်း(၁၇)၊ တပ်ရင်း(၁၄) တို့က ဗျူဟာမြောက် တိုက်ခိုက်ခဲ့ခြင်းဖြစ်သည်ဟု ဖော်ပြထားသည်။
အဆိုပါ တငူးဆိုစခန်း နှင့် စစ်ကောင်စီ ကြားစခန်းတစ်ခု အပါအဝင် အာဏာသိမ်းပြီးနောက် စစ်ကောင်စီ ခြေကုတ်စခန်း (၈)ခု သိမ်းပိုက်ရရှိခဲ့သည်ဟု ထုတ်ပြန်သည်။
တငူးဆို တပ်စခန်းမှ စစ်ကောင်စီတပ်များသည် ဩဂုတ် ၇ရက်တွင် စခန်းကို စွန့်ခွာလာရာ ကရင်နီ ပူးပေါင်းတပ်က တိုက်ခိုက်ခဲ့၍ တိုက်ပွဲ ၄ကြိမ်ဖြစ်ခဲ့ပြီး စစ်ကောင်စီတပ်ဖွဲ့ဝင် ၇ဦးထက်မနည်း သေဆုံးခဲ့သည်ဟု KNDF တပ်ရင်း(၁၇)က ဩဂုတ် ၁၄ရက်တွင် ထုတ်ပြန်ထားသည်။
