တောင်ကိုရီးယားနိုင်ငံ ဆိုးလ်မြို့ရှိ ဘူတာတွင် ပြည်ပရောက် မြန်မာနိုင်ငံသားများ ဦးဆောင်၍ မြန်မာ့ဒီမိုကရေစီအရေး ထောက်ခံပွဲနှင့် အကြမ်းဖက် စစ်အာဏာရှင်စနစ် ဆန့်ကျင်ရေး ဆန္ဒထုတ်ဖော်ပွဲကို ယနေ့ (သြဂုတ် ၂၁) ၌ ကျင်းပပြုလုပ်ခဲ့ကြသည်။
ယနေ့ နေ့လည်ပိုင်းတွင် ဆိုးလ်မြို့ဘူတာရုံ အဝင်ပေါက်နှင့် လှေကားများပေါ်တွင် ယင်းဆန္ဒထုတ်ဖော်ပွဲကို ကျင်းပပြုလုပ်ခဲ့ပြီး တောင်ကိုရီးယား ဒီမိုကရေစီအရေး လှုပ်ရှားမှု အဖွဲ့အစည်းများနှင့် ဆူဝမ် မြန်မာ အသင်းတို့ ပူးပေါင်း လုပ်ဆောင်ခဲ့ကြသည်။
![ဓာတ်ပုံ - SMC](https://i0.wp.com/www.ludunwayoo.com/wp-content/uploads/2022/08/300771612_448959487293509_5038825280056875126_n.jpg?resize=768%2C1024&ssl=1)
တောင်ကိုရီးယား နိုင်ငံရောက် မြန်မာများက အမျိုးသားညီညွတ်ရေး အစိုးရ NUG ကို ထောက်ခံအားပေးရေး၊ အကြမ်းဖက် စစ်အာဏာရှင်စနစ်ကို ဆန့်ကျင်ရေး၊ ဖမ်းဆီးခံ နိုင်ငံ့ခေါင်းဆောင်များနှင့် ပြည်သူများကို လွှတ်ပေးရေး စာတန်းများ ကိုင်ဆောင်၍ ဆန္ဒပြခဲ့ကြသည်။
ထို့အပြင် တောင်ကိုရီးယားနိုင်ငံရှိ မြန်မာနိုင်ငံသား EPS အလုပ်သမားများ ပိုမိုကောင်းမွန်သော စနစ်ဖြစ်ပေါ်စေရေး၊ အလုပ်ရှင် အလုပ်သမား ခွဲခြားမှုမရှိဘဲ တန်တူ အခွင့်ရေး ရရှိစေရေး၊ လုပ်ငန်းခွင် အတွင်း အန္တရာယ်ကင်းစွာ လုပ်ကိုင်နိုင်ရေး အတွက်လည်း ဆန္ဒထုတ်ဖော်ခဲ့ကြသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)