ရလဒ်ထွက်ပေါ်မည်မဟုတ်သည့် ကုလအထူးကိုယ်စားလှယ်၏ လုပ်ပိုင်ခွင့်အာဏာကို ရုတ်သိမ်းရန်တိုက်တွန်း
မြန်မာ့အရေးဖြေရှင်းရန် ကုလသမဂ္ဂအတွင်းရေးမှူးချုပ်ကိုယ်တိုင်တာဝန်ယူပြီး တိကျပြတ် သားသည့်အရေးယူဆောင်ရွက်မှုလုပ်ဆောင်ရန် အရပ်ဘက်အဖွဲ့အစည်း ၈၆၄ ဖွဲ့က လက်မှတ်ရေးထိုး တောင်းဆိုလိုက်သည်။
ကုလသမဂ္ဂအထူးကိုယ်စားလှယ်နှင့် စစ်ရာဇဝတ် ကောင် မင်းအောင်လှိုင်တို့ တွေ့ဆုံမှုကို အထက်ပါ ပြည်တွင်းနှင့် နိုင်ငံတကာအရပ်ဘက်အဖွဲ့အစည်းများက ကန့်ကွက်ရှုတ်ချလိုက်ပြီး ကုလအထူးကိုယ်စားလှယ်၏ လုပ်ပိုင်ခွင့်အာဏာကို ပြန်လည်ရုတ်သိမ်းက တောင်းဆိုသည်။
“ကုလသမဂ္ဂအနေနဲ့ မြန်မာ့အရေးအပေါ် ဖြေရှင်းတဲ့ သမားရိုးကျ ချဉ်းကပ်ပုံကို အဆုံးသတ်ရပါ မယ်။ ရှည်လျားလှတဲ့ သမိုင်းအစဉ်အလာအရ ကုလအထူးကိုယ်စားလှယ်တွေကတဆင့် မြန်မာစစ်တပ်နဲ့ ငြိမ်းချမ်းရေးအကျိုး ဆောင်ရွက်ဖို့ ကြိုးပမ်းမှုတွေဟာ အဓိပ္ပါယ်ရှိတဲ့ရလဒ်တွေအဖြစ် ဘယ်တုန်းကမှ ဖြစ်ပေါ်မလာဘဲ နိုင်ငံတကာရာဇဝတ်မှုတွေ ချိုးဖောက် ကျူးလွန်နေသူတွေကို တရားဝင်မှုပေးရာရောက်နေပြီး လူ့အခွင့်အရေးနဲ့ လူသားချင်းစာနာထောက်ထားမှု ဆိုင်ရာ အကြပ်အတည်းတွေကို ပိုမိုဆိုးရွားစေပါတယ်” ဟု ထုတ်ပြန်ချက်၌ ဖော်ပြသည်။
စစ်အုပ်စုအပေါ် အချိန်ပေး-စောင့်ကြည့်မည့် ကုလသမဂ္ဂအထူးသံတမန်နှင့် ကုလသမဂ္ဂ၏ လက်ရှိ ချဉ်းကပ်ပုံသည် မည်သည့်ရလဒ်မှ ထွက်ပေါ်လာခြင်း ရှိမည်မဟုတ်ကြောင်းကို ဆယ်စုနှစ်များစွာကတည်းက အထင်အရှား သက်သေပြခဲ့ပြီးလည်းဖြစ်သည်။
ထို့အတွက် လာမည့် စက်တင်ဘာတွင် ပြုလုပ်မည့် ကုလသမဂ္ဂအထွေထွေညီလာခံ အစည်းအဝေးတွင် ကုလသမဂ္ဂအဖွဲ့ဝင်နိုင်ငံများက ကုလသမဂ္ဂ အထူးသံတမန်၏ လုပ်ပိုင်ခွင့်အာဏာကို ရပ်တန့်ရန်အရပ်ဘက်အဖွဲ့အစည်းများက တောင်းဆိုသည်။
ထို့အပြင် ကုလသမဂ္ဂအထွေထွေညီလာခံ UNGA အနေဖြင့် တာဝန်ယူမှု တာဝန်ခံမှု ရှိလာစေရေးကို အဓိကထားသည့် အရေးယူဆောင်ရွက်မှုများ လုပ်ဆောင်ရန်နှင့် မြန်မာပြည်သူလူထု၏ ဆန္ဒနှင့် တောင်းဆိုချက်များကို ထင်ဟပ်သည့် တိကျခိုင်မာသော အရေးယူဆောင်ရွက်မှုများ စီစဉ် လုပ်ဆောင်ရမည်ဟု ၎င်းတို့က တိုက်တွန်းသည်။
