ဥရောပသမဂ္ဂနှင့် ကမ္ဘာ့ကျန်းမာရေးအဖွဲ့(WHO)တို့သည် ထိခိုက်အလွယ်ဆုံးသောသူများအတွက် ကျန်းမာရေးစောင့်ရှောက်မှုများနှင့် အသက်ကယ်အကူအညီများကို ဆက်လက်ပံ့ပိုးပေးနေကြောင်း ယနေ့သတင်းထုတ်ပြန်သည်။
မကြာသေးမီက ကုလသမဂ္ဂအထူးကိုယ်စားလှယ်နှင့် တရားမဝင်အာဏာသိမ်းစစ်ခေါင်းဆောင် တို့တွေ့ဆုံစဉ် အကြမ်းဖက်စစ်ခေါင်းဆောင်မင်းအောင်လှိုင်က ၂၀၂၁ခုနှစ်Covid-19 ပြင်းထန်နေ ချိန်တွင် WHO ထံမှ မည်သည့်အကူအညီမျှ မရရှိခဲ့ကြောင်း ပြောဆိုမှုအပြီးတွင် အီးယူက တုံ့ပြန်ထုတ်ပြန်လာခြင်းဖြစ်သည်။
“ဥရောပသမဂ္ဂနှင့် ကမ္ဘာ့ကျန်းမာရေးအဖွဲ့ တို့၏အရှေ့တောင်အာရှဒေသအတွက် ကပ်ရောဂါဆိုင်ရာ တုံ့ပြန်မှု နှင့် ကြိုတင်ပြင်ဆင်မှုဆိုင်ရာ ဒေသတွင်းအစီစဉ်တွင် ကိုဗစ်-၁၉ ရောဂါပျံ့ပွားမှုကို စောင့်ကြပ်ခြင်း၊ ဘေးအန္တရာယ်ဆိုင်ရာ ဆက်သွယ်ရေး၊ လုပ်ဆောင်မှုအဆင့်များကို စီမံခန့်ခွဲခြင်း၊ မရှိမဖြစ်လိုအပ်သည့် ကျန်းမာရေးဝန်ဆောင်မှုဆိုင်ရာ စီစဉ်ဆောင်ရွက်ခြင်းနှင့်အထောက်အပံ့အစီအစဉ်များလည်ပတ်ရေးအတွက် ကူညီပံ့ပိုးခြင်းတို့ ပါဝင်ပါသည်” ဟု ထုတ်ပြန်သည်။
အထက်ပါအစီအစဉ်သည် ရခိုင်ပြည်နယ်၊ ကချင်ပြည်နယ်နှင့် ရှမ်းပြည်နယ်တောင်ပိုင်းတို့ ရှိ လက်လှမ်းမီရန် ဝေးလံသောဒေသများမှ ပြည်သူပေါင်း ၂၅၀၀၀ အပေါ် အကျိုးသက်ရောက်မှုရှိခဲ့ပြီး ရှေ့တန်းမှ ဆောင်ရွက်လျက်ရှိကြသည့် ကျန်းမာရေးလုပ်သားများ ပိုမိုကောင်းမွန်စွာ ကာကွယ်နိုင်ရေးအတွက် တကိုယ်ရည်ကာကွယ်ရေးပစ္စည်းအစုံ ၅၂၀၀ စုံ ကိုပံ့ပိုးခဲ့ကြောင်း ဖော်ပြသည်။
ကျန်းမာရေးလုပ်သားပေါင်း ၂၄ ဦးတို့ကို ကိုဗစ်-၁၉ ဆိုင်ရာ ဆေးကုသမှု စီမံခန့်ခွဲမှုနှင့် ပတ်သက်ပြီး သင်ကြားပို့ချပေးခဲ့ပြီး ရောဂါစစ်ဆေးရန်နေရာ ၁၆ နေရာ ကိုလည်း အဆင့်မြှင့်တင်ပေးခဲ့ သည်ဟု အီးယူက ထုတ်ပြန်သည်။
ထို့အပြင် အီးယူမှ ရန်ပုံငွေ မတည်ထားသည့် ယခုအစီအစဉ်သည် မကြုံစဖူး လူသားချင်းစာနာထောက်ထားမှုဆိုင်ရာ အကျပ်အတည်းနှင့် တွေ့ကြုံနေရချိန်တွင် ကပ်ရောဂါဆိုင်ရာ တုံ့ပြန်မှုအတွက် အရေးပါသည့် အခန်းကဏ္ဍမှ ရပ်တည်နေကြောင်း ဖော်ပြသည်။
