မန္တလေးမြို့ နန်းမြောက်အပေါက်မှ ထွက်လာသော အကြမ်းဖက်စစ်ကောင်စီတပ် အင်အား ၅၀ ခန့်သည် မတ္တရာမြို့နယ် ဇီးဖြူပင်ကျေးရွာအား ယနေ့(သြဂုတ် ၂၃)ညနေပိုင်းတွင် မီးရှို့ဖျက်ဆီးနေကြောင်း ဒေသအခြေစိုက် တော်လှန်ရေးအင်အားစုများထံမှ သတင်းရရှိသည်။
စစ်ကားခြောက်စီးဖြင့် ထွက်လာသော စစ်ကောင်စီတပ်များသည် ယမန်နေ့(သြဂုတ် ၂၂ ရက်) တွင် မကျည်းတန်းရွာ၌ညအိပ်ပြီး ယနေ့ နေ့လယ် ၂ နာရီကျော်တွင် ဇီးဖြူပင်ရွာသို့ရောက်ရှိကာ ညနေ ၄ နာရီ ၁၅ ခန့်တွင် နေအိမ်များအား စတင်မီးရှို့ဖျက်ဆီးနေခြင်းဖြစ်ကြောင်း ဒေသသတင်းရင်းမြစ်များက ပြောသည်။
“ဒေသခံပြည်သူ တစ်ချို့တစ်၀က် ပြေးနေရပြီ။ အနည်း အကျဉ်းဘဲ ကျန်ခဲ့ပါတယ်”ဟု တော်လှန်ရေးအဖွဲ့အစည်းတစ်ခုမှ ရဲဘော်တစ်ဦးက လူထုနွေဦးသို့ ပြောသည်။
စစ်ကောင်စီတပ်များသည် ဇီးဖြူပင်ရွာရှိ သစ်တောရုံးနှင့် ကျေးရွာစာသင် ကျောင်းတို့တွင် အထိုင်ချတပ်စွဲထားပြီး အဆိုပါ စစ်ကောင်စီတပ်များ၏ မီးရှို့ဖျက်ဆီးခံနေရသော ဇီးဖြူပင်ကျေးရွာတွင် အိမ်ခြေ (၁၅၀)ကျော် ရှိကြောင်း အထက်ပါ တော်လှန်ရေးရဲဘော်က ရှင်းပြသည်။
မတ္တရာနယ် ဇီးဖြူပင်ကြိုးတံတားအနီးတွင် သြဂုတ် ၂၁ ရက်နေ့နေ့လယ်ပိုင်းက အင်အား (၂၇)ဦးခန့်ဖြင့် ခြေ ကျင်တက်လာသော စစ်ကောင်စီတပ်စစ်ကြောင်းကို တိုက်သိမ်းနှင့် နတ်ဆိုး မြေအောက်တော်လှန်ရေးအဖွဲ့များက မိုင်းဆွဲတိုက်ခိုက်ခဲ့ရာ စစ်ကောင်စီတပ်သား သုံးဦးထက်မနည်း သေဆုံးခဲ့သည်။
