မကွေးတိုင်း၊ ထီးလင်းမြို့နယ်တွင် အင်အား ၁၀၀ ခန့်ပါ စစ်ကောင်စီစစ်ကြောင်းကို ခြုံခိုတိုက်ခိုက်ရာ စစ်ကောင်စီတပ်သား ငါးဦးထက်မနည်းသေဆုံးကြောင်း YDF(ထီးလင်း)က ထုတ်ပြန်သည်။
ယနေ့(သြဂုတ် ၂၄ ရက်) နံနက် ၈ နာရီခန့်တွင်ရွှေခုံတိုင်ကျေးရွာတွင် ညအိပ်ပြီး ထွက်လာသော စစ်ကောင်စီစစ်ကြောင်းကို ရွှေခုံတိုင်ကျေးရွာ ၏ တောင်ဘက် (၃)မိုင်ခန့်အကွာ YDF- ထီးလင်း (တပ်ရင်း- ၇၊၈)မှ အနီးကပ် တိုက်ခိုက်ခဲ့သည်ဟု ဆိုသည်။
တိုက်ခိုက်မှုတွင် စစ်ကောင်စီတပ်သားငါးဦးထက် မနည်း သေဆုံးပြီး ဒဏ်ရာရရှိသူအများအပြား ရှိနိုင်ကြောင်း ဖော်ပြသည်။
“ဒီမနက် ၆ နာရီခွဲကစလို့ ရွှေခုံတိုင်ကျေးရွာကနေ ထွက်လာခဲ့တာ။အဲဒါကို ကျွန်တော်တို့ စောင့် တိုက်ခဲ့တာ။ထိတွေ့က ၁၅ မိနစ် လောက်ကြာတယ်။သေတာနဲ့ ထိခိုက်တာတွေကို ရှေ့တန်း ကင်းထောက်တွေက အတည်ပြုနိုင်ခဲ့တယ်”ဟု YDF-ထီးလင်း တာဝန်ရှိသူက လူထုနွေဦးသို့ ပြောသည်။
YDF- ထီးလင်း တပ်ဖွဲ့မှာ အထိခိုက်မရှိ အောင်မြင်စွာ ဆုတ်ခွာနိုင်ခဲ့ကြောင်း အသိပေးသည်။
ယနေ့ ညနေ ၃နာရီခွဲခန့်အချိန်တွင် စစ်ကြောင်းသည် လူနာအထမ်း လေးခုဖြင့် ပဇင်းချောင်ကျေးရွာသို့ ဝင်ရောက်တပ်စွဲနေကြောင်း YDF- ထီးလင်းက ဆိုသည်။
