မွန်ပြည်နယ် ကျိုက်ထိုမြို့နယ်အတွင်း နိုင်ငံရေးမတည်ငြိမ်မှုကို အခွင့်ကောင်းယူ အကြောင်းပြပြီး လုပ်ငန်းရှင်များနှင့် ပြည်သူများထံ ငွေကြေးကောက်ခံမှုများ ရှိနေသည့်အပေါ် ကျိုက်ထို တော်လှန်ရေးအင်အားစုများ(KRF)က ယနေ့ သတိပေး ချက်ထုတ်ပြန်သည်။
လက်နက်ကိုင်အဖွဲ့အစည်းတစ်ခုခုဟု အမည်ခံ၍ ဖုန်းဆက်၍ သော်လည်းကောင်း၊ ခြိမ်းခြောက်၍သော်လည်းကောင်း ငွေကြေးတောင်းခံနေသည်ကို KRFက သေချာစွာ စုံစမ်းထားသည်ဟုဆိုသည်။
ထိုသို့ လက်နက်ကိုင်အဖွဲ့အမည်ခံပြီးငွေကြေးတောင်းခံနေသူများ အနေဖြင့် အေးချမ်းစွာ လုပ်ကိုင်ရှာဖွေ စားသောက်နေကြသည့် ပြည်သူများအပေါ် မတရား ခြိမ်ခြောက် ငွေကြေးတောင်းခံခြင်းကို ရပ်တန်းက ရပ်ရန် နောက်ဆုံးအကြိမ် သတိပေးလိုက်ပြီး မရပ်တန့်ဘဲ ဆက်လုပ်နေပါက စစ်ရေးပစ်မှတ်အဖြစ် သတ်မှတ်ပြီး သုတ်သင်ရှင်းလင်းသွားမည်ဟု KRFက ကြေညာခဲ့သည်။
KRFသည် ကရင်အမျိုးသားအစည်းအရုံး(KNU) လက်အောက်ခံ ကရင်အမျိုးသားလွတ်မြောက်ရေးတပ်မတော်(KNLA)နှင့် လက်တွဲပြီး စစ်ကောင်စီတပ်ကို တိုက်ခိုက်နေသည့် တော်လှန်ရေးတပ်ဖြစ်သည်။
