၈ လေးလုံးအရေးတော်ပုံ ထီးသပိတ် လှုပ်ရှားမှုမှာ ပါဝင်ခဲ့တဲ့ အဖွဲ့ဝင် ၂ဦး ဖမ်းမိထားတယ်လို့ စစ်ကောင်စီဘက်က သတင်းထုတ်လာပါတယ်။
ထီးသပိတ်လှုပ်ရှားမှုကိုပြုလုပ်ခဲ့တဲ့ လူငယ်အချို့ ဖမ်းခံရတယ်လို့ သြဂုတ်လ ၂၀ ရက်ဝန်းကျင်မှာ သတင်းတွေထွက်ပေါ်ခဲ့ပြီး နောက် ဒီရက်ပိုင်းမှာ စစ်တပ်လော်ဘီတွေ သုံးတဲ့ လူမှုကွန်ရက်အကောင့်တွေက နေ ဖမ်းမိတဲ့ပုံတွေကို ဖော်ပြလာတာတွေ့ရပါတယ်။
အဲဒီပုံထဲမှာ လူငယ် ၂ ဦးကိုဖမ်းဆီးထားပြီး လူငယ်တစ်ဦးမှာဆိုရင် ထိုးကြိတ်ခံထားရတဲ့ ဒဏ်ရာတွေကိုတွေ့မြင်ရပါတယ်။
ပြီးခဲ့တဲ့ သြဂုတ်လ ၈ ရက်နေ့မှာ ကျရောက်တဲ့ ၈ လေးလုံး အရေးတော်ပုံ ၃၄ နှစ်မြောက် အထိမ်းအမှတ်အနေနဲ့ ရန်ကုန်မြို့ရဲ့အထင်ကရနေရာတွေဖြစ်တဲ့ ဆူးလေ လူကူးဂုံးတံတား၊ ဗိုလ်ချုပ်ဈေး၊ အင်းလျားကန်ဘောင်နဲ့ လှည်းတန်းနေရာအနှံ့အပြားမှာ ‘၈’ လေးလုံးရေးဆွဲထားတဲ့ ထီးတွေနဲ့ စစ်အာဏာရှင်ဆန့်ကျင်ရေးလှုပ်ရှားမှုပြုလုပ်ခဲ့တာဖြစ်ပါတယ်။
