စစ်ကောင်စီတပ်၏ မိုးဗြဲမြို့ အခြေစိုက် ခမရ(၄၂၂)တပ်၏ ကင်းပုန်းနေရာ နှစ်ခုကို စနိုက်ပါအဖွဲ့မှ သွားရောက်တိုက်ခိုက်ရာ စစ်ကောင်စီတပ်သားအနည်းဆုံး နှစ်ဦးထိခိုက်ဒဏ်ရာရရှိကြောင်း မိုးဗြဲပြည်သူ့ကာကွယ်ရေးတပ်(MBPDF) ယနေ့(သြဂုတ် ၂၆ ရက်) ထုတ်ပြန်သည်။
MBPDF B-01 စနိုက်ပါအဖွဲ့က ယမန်နေ့(သြဂုတ် ၂၅ ရက်) နေ့လည် ၁ နာရီ ၁၅မိနစ်ခန့်တွင် ခမရ (၄၂၂) ကင်းပုန်း နှစ်နေရာကို သွားရောက်ပစ်ခတ်ခဲ့ခြင်းဟု ဆိုသည်။
ထို့နောက် နှစ်ဖက်အပြန်အလှန်ပစ်ခတ်မှုများမှာ ၁ နာရီခန့်ကြာမြင့်ခဲ့ကြောင်း ဖော်ပြသည်။
ထိုနေ့ နေ့လည် ၃နာရီခန့်တွင်လည်း စစ်ကောင်စီစစ်ကြောင်းကို MBPDF B-01၊ KNDF B-03၊ URF တို့မှ ကြားဖြတ်တိုက်ခိုက်ခဲ့သည်ဟု အသိပေးသည်။
အဆိုပါတိုက်ပွဲ၌ စစ်ကောင်စီတပ်၏ထိခိုက်မှုကို MBPDF က အတည်မပြုနိုင်သေးပေ။
“မနေ့က နေ့လည် ၂ နာရီကျော်လောက်ထိ လက်နက်ကြီးသံတွေ မြို့တွင်းထဲကနေအထိကြားရတာ။မြို့ထဲကသူတွေ ထိခိုက်တာတော့ မရှိခဲ့ဘူး”ဟု မိုးဗြဲမြို့နေပြည်သူတစ်ဦးက People’s Springသို့ ပြောသည်။
ယမန်နေ့က ထိတွေ့တိုက်ပွဲများ၌ ပြည်သူ့ကာကွယ်ရေးပူးပေါင်းတပ်များ အထိအခိုက်မရှိ အောင်မြင်စွာပြန်လည်ဆုတ်ခွာနိုင်ခဲ့ကြောင်း ထုတ်ပြန်ချက်၌ ဖော်ပြသည်။
