စစ်ကိုင်းတိုင်း ကလေးမြို့နယ်တွင် ကျေးရွာအတွင်း စစ်ကောင်စီတပ် လက်နက်ကြီးဖြင့် ပစ်ခတ်၍ အရပ်သားပြည်သူရှစ်ဦး ကျဉ်ထိမှန်ဒဏ်ရာရရှိခဲ့သည်။
ကလေးမြို့ ဘိုကုံးကျေးရွာအတွင်းသို့ စစ်ကောင်စီတပ်က ယမန်နေ့(သြဂုတ် ၂၅ရက်)ည ၈နာရီကျော် တွင် လက်နက်ကြီးဖြင့် ပစ်ခတ်ခြင်းဖြစ်သည်။
“ကျွန်တော်တို့ တက်မလာအောင် ခြောက်လှန့်ပြီး ပစ်တာထင်တယ်။ကျွန်တော်တို့ရှိတဲ့နေရာနဲ့ တခြားစီပဲ။ ရွာထဲကို ကျပြီး ပြည်သူတွေ ကံဆိုးသွားတာ”ဟု ကလေး PDFမှ ရဲဘော်တစ်ဦးကပြောသည်။
ဒဏ်ရာရသူများသည် အသက် (၃၀)မှ (၅၀)ကြား အမျိုးသမီး ငါးဦး နှင့် အမျိုးသား သုံးဦးတို့ဖြစ်သည်။ ထို့အပြင် အခြားရွာတစ်ရွာမှနေ၍ ဘိုကုံးရွာအတွင်း လာရောက် စစ်ဘေးရှောင်နေကြရင်း နေအိမ်တစ်ခုအတွင်း ရှိနေစဥ် လက်နက်ကြီးကျရောက်ပေါက်ကွဲခြင်းဖြစ်သည်။ ခန္တာကိုယ်တွင် ယမ်းစထိမှန်ဒဏ်ရာရခဲ့ကြပြီး အသက်အန္တရာယ် စိုးရိမ်စရာမရှိတော့ကြောင်း ဒေသခံများက ပြောသည်။
ကလေးမြို့တွင် စစ်ရေးတင်းမာနေပြီး စစ်ကောင်စီ၏ ခြေလျင်စစ်ကြောင်းတစ်ခုအား ပြည်သူ့ကာကွယ်ရေးအဖွဲ့ ယနေ့ နံနက် မိုင်းဆွဲတိုက်ခိုက်ခဲ့သည်။ ယင်းဖြစ်စဥ်တွင် ဗိုလ်တစ်ဦးအပါအဝင် သုံးဦးသေဆုံးခဲ့သည်။
