ကျွန်းလှမြို့နယ်အတွင်းရှိ ကျေးရွာများသို့ ဝင်ရောက်စီးနင်းနေသည့် စစ်ကောင်စီတပ်သည် ယနေ့နံနက်ပိုင်းတွင် ကုန်းစည်းရွာကို မီးရှို့ခဲ့ပြီး ညနေပိုင်းတွင် တည်ပင်ဆိပ်ရွာကို မီးရှို့ခဲ့ဟု ကျွန်းလှတက်ကြွလှုပ်ရှားသူများအဖွဲ့က ထုတ်ပြန်သည်။
နံနက် ၇နာရီက ကုန်းစည်းရွာကို မီးရှို့ခဲ့သည့် စစ်ကောင်စီတပ်သည် ညောင်ပင်ရွာကို လက်နက်ကြီးဖြင့် ပစ်ခတ်ဝင်ရောက်စီးနင်းခဲ့ကြောင်း ဖော်ပြသည်။
မီးရှို့ခံရသည့် ကုန်းစည်းရွာမှ အိမ်ခြေ ၆၀ခန့် ပြာကျခဲ့ကြောင်း ၊ ကုန်းဏည်းရွာမ ရွာထဲမှ စာကြည့်တိုက် အပါအဝင် နေအိမ် ၄၂လုံး၊ အရှေ့ကုန်းစည်းရွာမှ နေအိမ် ၁၇လုံး၊ စုစုပေါင်း ၅၉ လုံးပျက်စီးခဲ့သည်ဟု ဒေသတွင်း သတင်းများ ဖော်ပြနေသည့် Infinity Groupက အသိပေးထားသည်။
စစ်ကောင်စီတပ်သည် ကျေးရွာ ဘုန်းကြီးကျောင်းထဲမှ ပစ္စည်းများ၊ စားနပ်ရိက္ခာများ၊ ကား၊ ဆိုင်ကယ်များကိုလည်း ဖျက်ဆီးသွားပြီး ရွာထဲမှ နေအိမ်များကို ဝင်ရောက် ဖျက်ဆီးခဲ့သည်ဟု ဆိုသည်။ အဆိုပါကုန်းစည်းရွာကို စစ်ကောင်စီတပ်က ယခင်ကလည်း မီးရှို့ဖျက်ဆီးခဲ့ဖူးသည်။ စစ်ကောင်စီတပ်သည် ရွာခံအချို့ကိုလည်း ဖမ်းဆီးထားကြောင်း ဖော်ပြထားသည်။
ကျွန်းလှ – ကန့်ဘလူနယ်စပ်တစ်နေရာတွင် ဩဂုတ် ၂၃ရက်က တိုက်ပွဲဖြစ်ပွားခဲ့ရာ စစ်ကောင်စီတပ် အထိနာခဲ့၍ ဩဂုတ် ၂၅ရက်တွင် လေကြောင်းတိုက်ခိုက်မှုများ ပြုလုပ်ကာ စစ်ကောင်စီတပ်က အင်အားများဖြည့်တင်းပြီး ဒေသတွင်းသို့ စစ်ကြောင်းထိုးပြီး ကျေးရွာများကို မီးရှို့ဖျက်ဆီးနေခြင်းဖြစ်သည်။
