မန္တလေးတိုင်း၊ မိုးကုတ်မြို့နယ်အနောက်ပိုင်း၊ ဂွေးပင် နှင့် လောင်းစင်ရွာကြားတိုက်ပွဲတွင် ဒုရင်းမှူး တစ်ဦး၊ သုံးပွင့်ဗိုလ်တစ်ဦးအပါအဝင် စစ်ကောင်စီတပ်မှ ခုနစ် ဦးသေဆုံးကြောင်း Red Wolves Of Mogok အဖွဲ့က ထုတ်ပြန်သည်။
စစ်ကောင်စီတပ်၏ အရာရှိနှစ်ဦးအား မီးသင်္ဂြိုလ်ခဲ့ပြီးတပ်သား ၅ ဦး မြေမြှုပ်ခဲ့သည်ဟု သတင်းအတည်ပြုနိုင်ကြောင်း၊ မိုးကုတ်ဆေးရုံသို့ (၁၄)ဦးပို့ဆောင်ခဲ့ပြီး (၇)မိုင်ဆေးရုံကိုလည်း လူနာတင်ကား ခြောက်စီးဖြင့် သုံးခေါက်ပို့ဆောင်ခဲ့သည်ဟု သတင်းထပ်မံရရှိကြောင်း Red Wolves Of Mogok အဖွဲ့၏ ထုတ်ပြန်ချက်တွင် ဖော်ပြသည်။
ယမန်နေ့ (သြဂုတ်၂၉ရက်) နံနက် ၈ နာရီခန့်က မိုးကုတ်အခြေပြုတပ်ရင်းများဖြစ်သည့် (၁၂၂၁)၊ (၁၂၂၂)၊ (၁၂၂၃)နှင့် ပြည်သူ့လွတ်မြောက်ရေးတပ်မတော် (PLA) တို့သည် မိုးကုတ်အနောက်ပိုင်း နယ်မြေတွင်း နေရာအသီးသီးတွင် အသင့်အနေအထားရှိစဉ် စစ်ကောင်စီ အပြန်စစ်ကြောင်းနှင့်ထိတွေ့မှုဖြစ်ပွားခဲ့ခြင်းဖြစ်သည်။
ထို့အပြင် ဂွေးပင်နှင့် လောင်းစင်ရွာကြားတွင် တပ်ရင်း ၁၂၂၂ က ရဲဘော် ၁၅ ဦးခန့်သည် မိုင်းဆွဲရန်စောင့်ဆိုင်းနေစဥ် စစ်ကောင်စီ အရာရှိများပါဝင်သော အင်အား (၂၀)ခန့်ပါ starx ကားအနီရောင်ထဲသို့ ဗုံးတစ်လုံးကို အနီးကပ်ပစ်သွင်းနိုင်ခဲ့သည်။
ဒုရင်းမှူး တစ်ဦး၊ သုံးပွင့်ဗိုလ်တစ်ဦး နေရာတွင် ကျဆုံးကြောင်းနှင့် တပ်ရင်းမှူး ထိခိုက်ဒဏ်ရာရရှိကြောင်း အတည်ပြုနိုင်ခဲ့သည်။ အတည်မပြုနိုင် သေးသော အထိအခိုက်များရှိကြောင်းလည်း ရှိနေကြောင်း Red Wolves Of Mogok ကအသိပေးသည်။
စစ်ကောင်စီတပ်၏ သေဆုံးမှုအခြေအနေနှင့်ပတ် သက်၍ Red Wolves Of Mogok တာဝန်ရှိသူက “ထုတ်ပြန်ချက်ထဲမှာပါသလို သူတို့ရဲ့ကားထဲကို ဗုံးတလုံး ပစ်ထည့်နိုင်တာရယ် မိုင်း သုံးလုံး ဖောက်ခွဲနိုင်ခဲ့တာရယ်ကြောင့်လို့ပဲ သုံးသပ်ပါမယ်ဗျ။”ဟု ပြောကြားသည်။
ဆက်လက်ပြီး စစ်ကောင်စီတပ်၏ အင်အား ၆၀ ခန့်ပါ ခြေလျင်စစ်ကြောင်းနှင့် အနီးကပ် အပြန်အလှန်ပစ်ခတ်မှု (၁)နာရီကြာဖြစ်ပွားခဲ့သည်။ ထိုတိုက်ပွဲတွင် မိုင်း (၃)လုံး ဖောက်ခွဲနိုင်ခဲ့ပြီး စစ်ကောင်စီတပ်က လက်နက်ကြီးများဖြင့် အချက် ၂၀ မှ၃၀ကြားပြန်လည် ပစ်ခတ်ခဲ့သည်။
ရဲဘော်များ အထိအခိုက်မရှိ ပြန်လည်ဆုတ်ခွာနိုင်ခဲ့ပြီး အကြမ်းဖက်စစ်တပ်သည် ညနေ၆နာရီချိန်ထိ လက်နက်ကြီးများဖြင့် အနီးအနားတောင်များသို့ ဆက်လက်ပစ်ခတ်ခဲ့ကြောင်း Red Wolves Of Mogok ၏ ထုတ်ပြန်ချက်တွင် ဖော်ပြသည်။
