ဂန့်ဂေါမြို့နယ်မြောက်ပိုင်းဒေသများမှ ဆန်စပါးနှင့် ဆီသယ်ယူရောင်းချခြင်းကို ပိတ်ပင်ကြောင်းဂန့်ဂေါမြို့နယ်ပြည်သူ့အုပ်ချုပ်ရေးအဖွဲ့ က ထုတ်ပြန်သည်။
ယခုအခါ ဂန့်ဂေါမြို့နယ် မြောက်ပိုင်းဒေသတွင် စစ်ကောင်စီတပ်များမီးရှို့ဖျက်ဆီးသောကြောင့် ဆန်စပါးနှင့် ကောက်ပဲသီးနှံများဆုံးရှုံးရခြင်း အကျိုးဆက်မှ ဆန်နှင့်ဆီ ဈေးနှုန်းကို ထိန်းညှိရန်လိုအပ်ခြင်း စသည့်အကြောင်းရင်းများကြောင့် ဂန့်ဂေါမြို့နယ် မြောက်ပိုင်းမှ ဂန့်ဂေါမြို့ပေါ်သို့လည်းကောင်း၊ ဂန့်ဂေါမြို့နယ်ပြင်ပသို့လည်းကောင်းဆန်စပါးနှင့်ဆီသယ်ယူရောင်းချခြင်းကို ပိတ်ပင်တားမြစ်ကြောင်း ဖော်ပြသည်။
အလားတူ ပြည်သူများ၏ စား၊ဝတ်၊နေရေး အဆင်ပြေစေရေးအတွက်ဆန်စပါးနှင့်ကုန်စည် အချို့သယ်ယူရောင်းချခြင်းများကိုအစဉ်သဖြင့် စောင့်ကြည့်ကြပ်မတ်နေသည်ဟု ဆိုသည်။
“လက်ရှိက ဂန့်ဂေါနယ်မြောက်ပိုင်းမှာ ဆန်၊စပါး၊နှမ်း ဆုံးရှုံးတာတွေများနေပါတယ်။ ကုန်သည်အချို့ ဈေးကစားတာတွေလုပ်လို့ လိုအပ်တာထက် ဈေးတက်နေပြီး စစ်ဘေးရှောင် မီးဘေးသင့်ပြည်သူတွေအတွက် အခက်အခဲတွေ ကြုံတွေ့နေရလို့ပါ”ဟု ကြေညာချက်နှင့်ဆက်စပ်၍ ဂန့်ဂေါမြို့နယ်ပြည်သူ့အုပ်ချုပ်ရေး အဖွဲ့တာဝန်ရှိသူက လူထုနွေဦးသို့ ရှင်းပြသည်။
“ဂန့်ဂေါ မြောက်ပိုင်းကို သြဂုတ် ၁၈ရက် လောက်စပြီး စခ တပ်တွေ စစ်ကြောင်းထိုးခဲ့တာ။နှမ်းခါး၊ထယ်လှော်(ဘင်း)၊မောက်၊ကျော် နဲ့ စိုင်ဒူးရွာ က ပြည်သူတွေရဲ့နေအိမ်တွေကိုပါ မီးရှို့တာတင်မကဘူး စားနပ်ရိက္ခာ၊ဆေးဝါးတွေပါ မီးရှို့ခဲ့တယ်။ပြီးတော့ စစ်ဘေးရှောင်တဲ တွေနဲ့ ကားတွေပါ ဖျက်ဆီးခံခဲ့ရတယ်”ဟု ဒေသခံ သတင်းရင်းမြစ်က လူထုနွေဦးသို့ ပြောသည်။
အဆိုပါ အကြမ်းဖက်စစ်ကောင်စီစစ်ကြောင်း သည် သြဂုတ် ၂၉ ရက်တွင် ဂန့်ဂေါမြို့နယ် အခြေစိုက် ခလရ (၅၀)တပ်တွင်းသို့ ဝင်ရောက် တပ်စွဲနေပြီဟု ၎င်းဆိုသည်။
ပိတ်ပင်တားမြစ်ချက်ကို ချိုးဖောက်ပါက တား မြစ်ကုန်ပစ္စည်းများအား အရေးယူသိမ်းဆည်းသွားမည်ဖြစ်ကြောင်း သတိပေးသည်။
