ဧရာဝတီတိုင်း ဝါးခယ်မမြို့နယ် ကျုံမငေးမြို့ ရေလယ်ကျွန်းကျေးရွာအုပ်ချုပ်ရေးမှူးရုံးကို ချိန်ကိုက်မိုင်းဖြင့် ဖောက်ခွဲတိုက်ခိုက်ခဲ့ကြောင်း ဝါးခယ်မ မြို့ပြပြောက်ကျားတပ်ဖွဲ့က ယနေ့(သြဂုတ် ၃၁) ထုတ်ပြန်သည်။
ယနေ့နံနက် ၄ နာရီခန့်က ရေလယ်ကျွန်းကျေးရွာမှ စစ်ကောင်စီအုပ်ချုပ်ရေးမှူးရုံးကို ချိန်ကိုက်မိုင်းတစ်လုံးဖြင့် ဖောက်ခွဲတိုက်ခိုက်ခဲ့ခြင်းဖြစ်ပြီး ထိခိုက်ပျက်စီးမှုအခြေအနေအား မသိရသေးကြောင်း ဖော်ပြသည်။
အထက်ပါတိုက်ခိုက်မှုဖြစ်စဥ်တွင် ချိန်ကိုက်မှုလုပ်ထားသော မိုင်းမှာသတ်မှတ်အချိန်အတွင်းပေါက်ကွဲမှုမရှိဘဲ အချိန်ကျော်သွားခြင်းကြောင့် အဆိုပါရုံးနားသို့ ပြည်သူများအသွားအလာမပြုလုပ်ကြရန် သတိပေးချက် ထုတ်ပြန်ခဲ့ရသည်။
“ကွဲတဲ့အချိန်တော့ မသိရသေးပါဘူး။ ချိန်ကိုက်လုပ်ထားတာ။ အချိန်ကျော်သွားလို့ သတိပေးစာ ထုတ်လိုက်တာပါ။ မိုးလင်းရင် ပြည်သူတွေသွားလာတာ ထိမှာစိုးလို့”ဟု ဝါးခယ်မ မြို့ပြပြောက်ကျားတပ်ဖွဲ့မှ ရဲဘော်တစ်ဦးက ရှင်းပြသည်။
ရေလယ်ကျွန်းကျေးရွာမှ စစ်ကောင်စီခန့်အုပ်ချုပ်ရေးမှူးသည် ဒေသခံပြည်သူများအပေါ် အာဏာပြခြင်း၊ ခြိမ်းခြောက်ခြင်းအပါအဝင် ပြည်သူအားနိုင်လွန်မင်းထက်ပြုမူနေသည်ဟု တိုင်ကြားလာသဖြင့် သတိပေးဖောက်ခွဲခဲ့ခြင်းဖြစ်ကြောင်း အထက်ပါရဲဘော်က ပြောသည်။
ထို့အပြင် ယနေ့နံနက်ပိုင်းကလည်း ကျုံမငေးမြို့ပေါ်မှတဆင့် ကျေးရွာများဘက်သွားရောက်မည့် စစ်ကောင်စီတပ်သဘော်နှစ်စီးမှ တစ်စီးကို အမည်မသိအဖွဲ့အစည်းတစ်ခုက ဖောက်ခွဲတိုက်ခိုက်ခဲ့ရာ သဘော်တစ်စီးပျက်စီးသွားကြောင်း ဒေသခံများကပြောသည်။
အထက်ပါ စစ်ကောင်စီတပ်သဘော်အားတိုက်ခိုက်မှုတွင် သင်္ဘောတစ်စီးထိခိုက်ပျက်စီးခဲ့သော်လည်း စစ်ကောင်စီတပ်များထိခိုက်သေဆုံးမှုရှိ၊မရှိ မသိရသေးပေ။
