▪︎စစ်ကောင်စီတပ်ဖွဲ့ဝင်များ CDM ပြုလုပ်လိုပါက ကြိုဆိုသွားမည်ဟု ဖိတ်ခေါ်
မန္တလေးတိုင်း ပြင်ဦးလွင်နှင့် နောင်ချိုမြို့နယ်များတွင် ဩဂုတ် ၂၄ရက်မှစ၍ တိုက်ပွဲများ ဖြစ်ပွားလျက်ရှိရာ စစ်ကောင်စီတပ်မှ ၄၀ ကျော် သေဆုံးပြီး အများအပြားဒဏ်ရာရရှိခဲ့ကြောင်း ပြည်သူ့ကာကွယ်ရေးတပ်မတော် (မန္တလေး)က သတင်းထုတ်ပြန်သည်။
စစ်ကောင်စီတပ်များသည် ဩဂုတ် ၂၄ရက်မှစ၍ လက်နက်ကြီးများဖြင့် စတင်တိုက်ခိုက်လာ၍ တိုက်ပွဲဖြစ်ပွားခဲ့ရာ ယင်းတိုက်ပွဲအတွင်း စစ်ကောင်စီတပ် စစ်ကြောင်းအား မန္တလေး PDF တပ်ဖွဲ့ဝင်များက အဆင့်ဆင့် ပိတ်ဆို့ တိုက်ခိုက်ခဲ့ကြောင်း၊ ထိခိုက်ကျဆုံးမှု များလာသည့် စစ်ကောင်စီတပ်သည် ယင်းနေ့ညနေပိုင်း၌ ရဟတ်ယာဉ်ဖြင့် လာရောက်ပစ်ခတ် ဗုံးကြဲခဲ့ကြောင်း ဖော်ပြထားသည်။
အဆိုပါ တိုက်ပွဲ၌ စစ်ကောင်စီတပ်မှ ၂၀ ခန့် ကျဆုံးပြီး ထိခိုက်ဒဏ်ရာရသူများပြားခဲ့ကြောင်း၊ မန္တလေး PDF ရဲဘော် ၂ဦး ဒဏ်ရာရခဲ့ကြောင်း အသိပေးထားသည်။
ဩဂုတ် ၂၉ရက် ညနေပိုင်းတွင်လည်း မန္တလေး PDF တပ်ဖွဲ့ဝင်များ မိုင်းကွင်းဖော်၍ နေရာယူထားသည့် နေရာသို့ စစ်ကောင်စီတပ်စစ်ကြောင်း ဝင်ရောက်လာ၍ မိုင်းဆွဲတိုက်ခိုက်ခဲ့ကြောင်း၊ အပြန်အလှန် ပစ်ခတ်မှုများ ရှိခဲ့ပြီး စစ်ကောင်စီတပ်မှ သေဆုံးထိခိုက်များခဲ့ကြောင်း ထုတ်ပြန်သည်။
အလာတူး သြဂုတ် ၃၀ ရက်မနက်ကစစ်ကောင်စီတပ် စစ်ကြောင်းကို ထပ်မံ မိုင်းဆွဲတိုက်ခိုက်ခဲ့ရာ ၃ဦးသေဆုံးခဲ့သည်ဟုသိရသည်။
တိုက်ခိုက်မှုများအတွင်း မန္တလေး PDF ဘက်မှ ဒဏ်ရာရသူအချို့ရှိခဲ့သော်လည်း ကျဆုံးမှုမရှိဟု အသိပေးသည်။
စစ်ကောင်စီတပ်သေဆုံး၊ဒဏ်ရာရရှိမှုအခြေအနေနှင့်ပတ်သပ်၍ People’s Spring ကသီးခြားအတည်မပြုနိုင်ပါ။
လက်ရှိတွင် စစ်ကောင်စီတပ်က အင်အားအလုံးအရင်း ဖြင့် ပိတ်ဆို့ ကာထိုးစစ်ဆင်နေကြောင်းလည်းဖော်ပြထားသည်။
လက်ရှိတွင် ခုခံစစ်အား အောင်မြင်စွာ ဆင်နွှဲနေပြီး ယခုထက်ပို၍ စစ်ရေးအရှိန် မြှင့်တင်ရန် အတွက်လည်း ကြိုတင်ပြင်ဆင်မှုများ ပြုလုပ်ထားကြောင်း၊ တိုက်ပွဲများအတွင်း စစ်ကောင်စီတပ်က အထိနာမှုများ ဆက်တိုက်ဖြစ်ပေါ်လျက်ရှိကြောင်း မန္တလေး PDFက အသိပေးသည်။
ထိုအပြင်စစ်ကောင်စီတပ်ဖွဲ့ဝင်များ CDMပြုလုပ်ကာ ပြည်သူ့ကာကွယ်ရေးတပ်မတော် (မန္တလေး)ထံ သို့ ပူးပေါင်းဝင်ရောက်လိုပါက နွေးထွေး စွာ ကြိုဆိုလက်ခံသွားမည်ဖြစ်ကြောင်းလည်းဖော်ပြထားသည်။
မန္တလေးပြည်သူ့ကာကွယ်ရေးတပ်(MPDF)သည် အမျိုးသားညီညွတ်ရေးအစိုးရ(NUG)၊ကာကွယ်ရေးဝန်ကြီးဌာနလက်အောက်ရှိ တပ်ဖွဲ့ဖြစ်သည်။
