ကရင်အမျိုးသားအစည်းအရုံး(KNU)နှင့် ချိတ်ဆက် ကာ CDM လုပ်ဆောင်ခဲ့သည့် စစ်ကောင်စီတပ်သားနှစ်ဦးကို ၎င်းတို့၏ မိသားစုနှင့် ဆုံဆည်းနိုင်ရေးအတွက် ကူညီဆောင်ရွက်ပေးခဲ့ကြောင်း Salween Press က ဖော်ပြသည်။
KNUနှင့် ချိတ်ဆက်ကာ CDMလုပ်လာသည့် စစ်ကောင်စီတပ်သားများနှင့် ကျန်ခဲ့သည့် မိသားစုဝင်များ ပြန်လည်ပေါင်းစည်းရေး အစီအစဉ်အရ ယခုကဲ့သို့ စစ်သည်မိသားစုဝန်များကို KNU က ခေါ်ယူပေးခဲ့ခြင်းဖြစ်သည်။
ယခု ထပ်မံခေါ်ယူပေးခဲ့သူများမှာ ဩဂုတ်လဆန်းက CDM ပြုလုပ်လာသည့် ခမရ(၂)က တပ်သား ဟိန်းစိုးနှင့် ခလရ(၅၄)က တပ်ကြပ် သန်းနိုင်ဦးတို့၏ မိသားစုများဖြစ်ကြောင်း ဖော်ပြထားသည်။
စစ်ကောင်စီတပ်မှ ရုန်းထွက်ပြီး ပြည်သူ့ရင်ခွင်ခိုလှုံလာသူများနှင့် မိသားစုဆုံဆည်းရေးကို KNU က ယခင်ကလည်း ကူညီဆောင်ရွက်ပေးခဲ့ဖူးသည်။
ဇူလိုင်လကုန်ပိုင်းက KNUထံ ခိုလှုံလာသည့် တပ်မ (၄၄) လက်အောက်ခံ ခမရ(၂၀၇)မှ ဒုတပ်ကြပ် ကျော်နိုင်စိုး၏ ကျန်ရှိ မိသားစုဝင်များကို KNUက ခေါ်ယူပေးခဲ့ရာ ဩဂုတ် ၁၃ရက်တွင် မိသားစုများ ဆုံဆည်းနိုင်ခဲ့ကြသည်။
ပြည်သူ့ဘက် ရပ်တည်လာသည့် စစ်ကောင်စီတပ် သားများကို KNUက လုံခြုံသည့်နေရာသို့ ပို့ပေးပြီး ပြည်သူ့ရင်ခွင်က စောင့်ရှောက်မှု ပေးလျက်ရှိသည်။
