မကွေးတိုင်း၊ မြိုင်မြို့နယ် ကန်နီကျေးရွာရှိ စစ်ကောင်စီတပ်နှင့် ပျူစောထီးများတပ်စွဲရာစခန်းသို့ ရှော့တိုက်ဒုံးဖြင့် ပစ်ခတ်တိုက်ခိုက်ခဲ့ကြောင်း မြိုင်မြို့နယ်ကျေးရွာများ တော်လှန်ရေးတပ်ဦး (MVRF)က သတင်းထုတ်ပြန်သည်။
စက်တင်ဘာ ၂ ရက် ည ၁၁ နာရီ၁၅မိနစ်ခန့်က မြိုင်နယ် ကန်နီ(ပျူ)ရွာရှိ စစ်အုပ်စုတပ်စွဲရာနေရာသို့ ရော့ကတ်များ ပစ်သွင်းတိုက်ခိုက်ခဲ့ကြောင်း MVRF က အသိပေးသည်။
ပျူများက လက်နက်ငယ်များဖြင့် ပြန်လည်ပစ်ခတ်မှုများပြုလုပ်ခဲ့သော်လည်း ရဲဘော်များအထိအခိုက်မရှိဟု ဆိုသည်။
အဆိုပါ တိုက်ခိုက်မှုတွင် ပြည်သူ့ကာကွယ်ရေးတပ်ဖွဲ့များဖြစ်သော Myaing Villages Revolution Front – ( MVRF )၊ SDB၊ ဗိုလ်ဂတုံးအဖွဲ့တို့ ပူးပေါင်းတိုက်ခိုက်ခဲ့ကြောင်း ၎င်းတို့က အသိပေးသည်။
စက်တင်ဘာ ၁ ရက်နှင့် ၂ ရက်တို့တွင် မြိုင်မြို့နယ်၊ ကန်နီရွာရှိ စစ်ကောင်စီတပ်နှင့်ပျူများကို မကွေးတိုင်းနှင့် စစ်ကိုင်းတိုင်းရှိ PDFအဖွဲ့များပေါင်းကာ တိုက်ခိုက်ခဲ့ကြပြီး စစ်ကောင်စီတပ်နှင့်ပျူများ ထိခိုက်သေဆုံးမှုရှိခဲ့သည်။