ဖရူဆို၌တပ်စွဲထားသည့် စစ်ကောင်စီတပ်ကိုလည်း ကရင်နီပူးပေါင်းတပ်တိုက်ခိုက်ရာ သေဆုံးထိခိုက်မှုရှိဟုဆို
ကရင်နီပူးပေါင်းတပ်ဖွဲ့နှင့် စစ်ကောင်စီတပ်တို့ ယနေ့နံနက်က ဒီးမော့ဆိုမြို့နယ် ငွေတောင်ရွာသစ်အနီး တိုက်ပွဲဖြစ်ပွားခဲ့ရာ စစ်ကောင်စီတပ် သေဆုံးထိခိုက်သူများရှိခဲ့ပြီး လက်နက်တစ်လက်နှင့် ခဲယမ်း၊ ကျည် များ သိမ်းဆည်းရရှိခဲ့ကြောင်း ကရင်နီအမျိုးသားများကာကွယ်ရေးတပ်(KNDF)က ထုတ်ပြန်သည်။
စက်တင်ဘာ ၄ ရက် နံနက် ၆နာရီခွဲတွင် ငွေတောင်ရွာသစ်ကျေးရွာအနီး၌ စစ်ကြောင်းထိုးတပ်စွဲထားသော အကြမ်းဖက်စစ်ကောင်စီတပ်ဖွဲ့အား ကရင်နီတပ်မတော် (KA) နှင့် KNDF တပ်ရင်း(၁၀)တို့ ပူးပေါင်းတိုက်ခိုက်ခဲ့ခြင်းဖြစ်သည်ဟု ဆိုသည်။
တိုက်ပွဲမှာ ၄နာရီကြာမြင့်ခဲ့ပြီး စစ်ကောင်စီတပ်မှ တစ်ဦးသေဆုံးကာ အပြင်းအထန် ဒဏ်ရာရသူများပြားခဲ့ကြောင်း၊ စစ်ကောင်စီတပ်ထံမှ MA-3 သေနတ် (၁)လတ် ၊ ခဲယမ်း နှင့်ကျည်ဆန်များကို သိမ်းဆည်းရမိခဲ့ကြောင်း ဓာတ်ပုံမှတ်တမ်းများနှင့်အတူ ဖော်ပြခဲ့သည်။
ယင်းတိုက်ပွဲ၌ ကရင်နီပူးပေါင်းတပ်ဖွဲ့မှ ထိခိုက်မှုမရှိကြောင်း အသိပေးထားသည်။
ယနေ့နေ့လည်ပိုင်းကလည်း ဖရူဆိုမြို့နယ် ဒေါညေးခူရွာနှင့် ထီးပေါ့ဆို ရွာအနီး တပ်စွဲထားသည့် စစ်ကောင်စီတပ်ကို ကရင်နီ ပူးပေါင်းတပ်ဖွဲ့က ၂နာရီကျော်ကြာ တိုက်ခိုက်ခဲ့ရာ စစ်ကောင်စီတပ်မှ သေဆုံးထိခိုက်မှုရှိနိုင်ကြောင်း၊ ပူးပေါင်းတပ်ဖွဲ့မှ ထိခိုက်မှုမရှိ ပြန်လည်ဆုတ်ခွာနိုင်ခဲ့ကြောင်း ထုတ်ပြန်ထားသည်။
တိုက်ပွဲများတွင် အထိနာခဲ့သည့် စစ်ကောင်စီတပ်သည် လက်နက်ကြီးများအား အလွန်အကျွံ အသုံးပြု ပစ်ခက်ခဲ့ကြောင်း၊ စစ်ကောင်စီတပ်သည် ဒီးမော့ဆို – ဖရူဆို လမ်းမကြီး တစ်လျှောက် စစ်ကြောင်းထိုးတပ်စွဲခြင်းများ လုပ်ဆောင်လျှက်ရှိပြီး နေ့စဉ်နီးပါး တိုက်ပွဲများ ဖြစ်ပွားနေကြောင်း KNDFက ထုတ်ပြန်ခဲ့သည်။
