မန္တလေးတိုင်း ကျောက်ဆည်ခရိုင် မြစ်သားမြို့နယ် ကူမဲမြို့မှ စစ်ကောင်စီခန့် တလိုင်းကုန်း ကျေးရွာ အုပ်ချုပ်ရေးမှူး သန့်ဇင်အား ပစ်ခတ်ရှင်းလင်းခဲ့ကြောင်း ကျောက်ဆည်ခရိုင်ကာကွယ်ရေးတပ်ဖွဲ့(K.D.D.F)က ယနေ့ (စက်တင်ဘာ ၅ )တွင် ထုတ်ပြန်သည်။
ယနေ့နံနက် ၆ နာရီခွဲခန့်က ကျောက်ဆည်ခရိုင်ကာ ကွယ်ရေးတပ်ဖွဲ့(K.D.D.F)နှင့် Urben Gurrilla Force -Kume တို့ပူးပေါင်းပြီး သုတ်သင်ရှင်းလင်းခဲ့ခြင်းဖြစ်ကြောင်း ဖော်ပြသည်။
အုပ်ချုပ်ရေးမှူးသန့်ဇင်သည် ယခင် Sintgaing LPDF မှ သုတ်သင်ရှင်းလင်းဖူးသော်လည်း အသက်မသေဘဲ စစ်ကောင်စီ မှပေးအပ်သောတာဝန်များအား ဆက်လက်ဆောင်ရွက်နေခြင်း၊ ယခင် ကူမဲစခန်းမှူးအောင်ဇော်လင်းသိန်းနှင့်အတူ လောင်းကစားဝိုင်းများထောင်ခြင်းတို့ ပြုလုပ်ခဲ့သည်ဟု ဆိုသည်။
ထို့အပြင် ကျည်ကာဝတ်ပြီးခါးကြား၌ သေနတ်ထိုးကာ အလှူ မဂ်လာဆောင်များပါမကျန် ခြိမ်းခြောက်ငွေတောင်းခြင်းများပြုလုပ်ခြင်း၊ စစ်ကောင်စီ တပ်ဖွဲ့ဝင်များနှင့်အတူလိုက်၍ သတင်းပေးခြင်း၊ ပြည်သူလူထုအား ခြိမ်းခြောက်အကြပ်ကိုင်ငွေညှစ်ခြင်းများကို ယခင်က ထက် ပိုမိုပြုလုပ်လာကြောင်း လူထူမှအကြိမ်ကြိမ်တိုင် ကြားလာသဖြင့် သုတ်သင်ရှင်းလင်းခဲ့ခြင်းဖြစ်ကြောင်း ဖော်ပြထားသည်။
စစ်ကောင်စီခန့်အုပ်ချုပ်ရေးမှူးကိုပစ်ခတ်ရှင်းလင်းမှုနှင့်ပတ်သပ်၍ KDDF အားထပ်မံမေးမြန်းရန်ကြိုးစားနေသော်လည်း အဆက်အသွယ်မရသေးပါ။
ကျောက်ဆည်ခရိုင်ကာကွယ်ရေးတပ်ဖွဲ့သည် ပြီးခဲ့သည့်သြဂုတ်လ ၁ရက်နေ့က မဟာမိတ်ညီနောင်များနှင့်အတူ ရန်ကုန်၊မန္တလေး(အမြန်လမ်း) မိုင်တိုင် ၃၄၂ ၊၆ ဖာလုံတွင် စစ်ကောင်စီတပ်ဖွဲ့ဝင်များ စီးနင်းလိုက်ပါလာသော ကားအား ပဒေသာမိုင်းဖြင့် မိုင်းဆွဲ တိုက်ခိုက်ခဲ့သေးသည်။
