စစ်ကောင်စီတပ်က ရေစကြိုနှင့် မြောင် ကူးသန်းစစ်ကြောင်းထိုးနေ၍ ပြည်သူထောင်ချီ တိမ်းရှောင်နေရ
မကွေးတိုင်း၊ ရေစကြိုမြို့နယ်၊ ရေလယ်ကျွန်းဒေသတွင် ယနေ့တစ်ရက်တည်း ကျေးရွာသုံးရွာ မီးရှို့ဖျက်ဆီးခံရပြီး စစ်ကောင်စီတပ်က ပြည်သူတစ်ဦးအား သတ်ဖြတ်သွားကြောင်း ဒေသခံများက ပြောသည်။
ယနေ့ (စက်တင်ဘာ ၅ရက်) နံနက် ၉ နာရီခန့်က မြောင်နယ် ပန်းညိုရွာမှ စစ်ကောင်စီစစ်ကြောင်းသည် မကွေးတိုင်း၊ ရေစကြိုနယ် ရေလယ်ကျွန်းဒေသရှိ မြေတော်ကျေးရွာသို့ရောက်ရှိပြီး မီးရှို့ဖျက်ဆီးမှုများပြုလုပ်ခဲ့ပြီး နေအိမ်ပေါင်း မည်မျှမီးလောင်ကျွမ်းသွားသည်ကို အတည်မပြုနိုင်သေးကြောင်း မြောင် CDSOM အဖွဲ့က ပြောသည်။
![မီးရှို့ဖျက်ဆီးခြင်းခံခဲ့ရသည့် ရေစကြိုနယ် ရေလယ်ကျွန်းရှိ ကျေးရွာတစ်ရွာအား တွေ့ရစဥ်၊ဓာတ်ပုံ-CJ](https://i0.wp.com/www.ludunwayoo.com/wp-content/uploads/2022/09/302327182_459277346261723_4847778074766761347_n.jpg?resize=720%2C540&ssl=1)
နံနက် ၁၀ နာရီ ၂၅ မိနစ်အချိန်ခန့်ကလည်း ရေစကြိုမြို့နယ် သင့်သည်ကျေးရွာအား စစ်ကေယင်စီတပ်နှင့် ပျူစောထီးများက မီးရှို့ဖျက်ဆီးခဲ့ပြီး ရွာသားတစ်ဦးကိုလည်း သတ်ဖြတ်သွားကြောင်း၊ ထို့အပြင် နေ့လယ် ပိုင်းတွင် ရေလယ်ကျွန်းဒေသရှိ ဇီးကုန်ကျွန်းကျေးရွာကိုလည်း မီးရှို့ဖျက်ဆီးသွားကြောင်း ဒေသခံများက ပြောသည်။
![မီးရှို့ဖျက်ဆီးခြင်းခံခဲ့ရသည့် ရေစကြိုနယ် ရေလယ်ကျွန်းရှိ ကျေးရွာတစ်ရွာအား တွေ့ရစဥ်၊ဓာတ်ပုံ-CJ](https://i0.wp.com/www.ludunwayoo.com/wp-content/uploads/2022/09/304870649_459277309595060_1906806188323404076_n.jpg?resize=672%2C575&ssl=1)
စစ်ကိုင်းတိုင်း၊ မြောင်နယ်နှင့် မကွေးတိုင်း ရေစကြိုနယ် ရေလယ်ကျွန်းဒေသသို့ စစ်ကောင်စီတပ်ဖွဲ့က မကြာခဏ ကူးသန်းကာ မီးရှို့ဖျက်ဆီးမှုများ ဆက်တိုက်ပြုလုပ်နေပြီး ပြည်သူထောင်ချီထွက်ပြေးတိမ်းရှောင်နေရသည်ဟု ဒေသတွင်းသတင်းရင်းမြစ်များက ပြောသည်။
ထို့အပြင် မြောင်နယ် ဘူးကိုင်းရွာကို စစ်ကောင်စီတပ်စစ်ကြောင်းတစ်ခု ဝင်ရောက်လာကာ ဒေသခံပြည်သူနှစ်ဦးကို ဖမ်းဆီးထားပြီး တစ်ဦးမှာ အပြင်းအထန်ရိုက်နှက်ခံထားရကြောင်း CDSOM အဖွဲ့က ပြောသည်။
![](https://i0.wp.com/www.ludunwayoo.com/wp-content/uploads/2022/09/304012104_459277249595066_1128027468334625358_n.jpg?resize=552%2C435&ssl=1)
![အကြမ်းဖက်စစ်ကောင်စီတပ်၏ မီးရှို့ဖျက်ဆီးသတ်ဖြတ်မှုများကြောင့် ထွက်ပြေးတိမ်းရှောင်နေရသည့် မြောင်နယ်ခံများ၊ဓာတ်ပုံ-CDSOM](https://i0.wp.com/www.ludunwayoo.com/wp-content/uploads/2022/09/302480319_459277136261744_1853899189603238933_n.jpg?resize=720%2C540&ssl=1)
![အကြမ်းဖက်စစ်ကောင်စီတပ်၏ မီးရှို့ဖျက်ဆီးသတ်ဖြတ်မှုများကြောင့် ထွက်ပြေးတိမ်းရှောင်နေရသည့် မြောင်နယ်ခံများ၊ဓာတ်ပုံ-CDSOM](https://i0.wp.com/www.ludunwayoo.com/wp-content/uploads/2022/09/304860900_459277219595069_7331858953493350549_n.jpg?resize=720%2C540&ssl=1)
![အကြမ်းဖက်စစ်ကောင်စီတပ်၏ မီးရှို့ဖျက်ဆီးသတ်ဖြတ်မှုများကြောင့် ထွက်ပြေးတိမ်းရှောင်နေရသည့် မြောင်နယ်ခံများ၊ဓာတ်ပုံ-CDSOM](https://i0.wp.com/www.ludunwayoo.com/wp-content/uploads/2022/09/302170549_459277299595061_4489359728477759896_n.jpg?resize=720%2C540&ssl=1)
“တိုက်တိုက် မတိုက်တိုက် မီးရှို့မဲ့အလုပ်ကတော့ စကစတို့ရဲ့အလုပ်မို့ လုပ်ပါလိမ့်မယ်။ လက်ရှိမှာတော့ စစ်ရှောင်ပြည်သူ ၃,၀၀၀ကျော် ဟာ နေရပ်အိမ်ဆီသို့ မပြန်နိုင်သေးဘူး စစ်ရှောင်နေရပါသေးတယ် ။ တစ်ချို့ဆို ၅ ရက်ကျော်နေပြီး အိမ်မှာ လူကော နွားတွေကော ဆက်နေလို့ မရတော့ပါဘူး။”ဟု CDSOM အဖွဲ့က ပြောသည်။
လက်ရှိတွင် မြောင်နယ်အတွင်းရှိ ထွက်ပြေးတိမ်းရှောင်နေရသည့်ပြည်သူများအတွက် ပံ့သကူ Project တစ်ခု စီစဥ်နေပြီး ပြည်သူများ ဝိုင်းဝန်းပါဝင်ကူညီပေးရန် မြောင်မြို့နယ်ပြည်သူ့ကာကွယ်ရေးနှင့်လုံခြုံရေးအဖွဲ့-CDSOM က မေတ္တာရပ် ခံထားသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)