မိုးသည်းထန်းစွာရွာပြီးနောက် မိုးမိတ် – မိုးကုတ် လမ်းပိုင်းတွင် မြေပြိုနေပြီး နေရာအချို့တွင် လမ်းပိတ်ဆို့မှုဖြစ်နေ၍ ခရီးသွားများ သတိပြုကြရန် ဒေသခံများက သတိပေးသည်။
မိုးမိတ်နှင့် မိုးကုတ်မြို့ကြားရှိ လွယ်ဆာကျေးရွာအနီးတွင် ယမန်နေ့(စက်တင်ဘာ ၅ရက်)က မိုးသည်းထန်စွာရွာခဲ့ပြီး မြေပြိုနေသည်ဟု ဒေသခံတစ်ဦးက ပြောသည်။
“မနေ့က ညနေက လာတဲ့ကားတွေ၊ဆိုင်ကယ်တွေပြန်လှည့်သွားရတယ်။ မြေပြိုတာက သုံးလေး မိုင်လောက်အထိ ရှည်တယ်”ဟု အဆိုပါ ဒေသခံက ပြောသည်။
![မြေပြိုနေမှု မြင်ကွင်းအား တွေ့ရစဉ်၊ ဓာတ်ပုံ - CJ](https://i0.wp.com/www.ludunwayoo.com/wp-content/uploads/2022/09/305530041_459717006217757_3818819452971716963_n.jpg?resize=880%2C829&ssl=1)
မိုးမိတ်နှင့် မိုးကုတ်မြို့တွင် ယမန်နေ့ နေ့လည်မှ ညနေအထိ မိုကောင်းခဲ့ခြင်းဖြစ်သည်။ လတ်တလောတွင် ဒေသအများစု မိုးကောင်းနေပြီး ရှမ်းပြည်နယ် တောင်ပိုင်း တာချီလိတ်မြို့နှင့် ကျိုင်းတုံမြို့နေရာအချို့တွင်လည်း ရေကြီးနစ်မြုပ်မှုများ ဖြစ်ပေါ်နေသည်ဟု ဒေသခံများက ပြောသည်။
လတ်တလောရာသီဥတုအခြေအနေအရ ရေကြီးမှုနှင့်မြေပြိုမှုဘေးကို သတိပြုနေထိုင်ကြရန် အမျိုးသားညီညွတ်ရေးအစိုးရ၊ လူသားချင်းစာနာထောက်ထားရေးနှင့် ဘေးအန္တရာယ်စီမံခန့်ခွဲရေးဝန်ကြီးဌာနက သတိပေးထားသည်။
စက်တင်ဘာလ ၈ ရက်မှစတင်ကာ ဘင်္ဂလား ပင်လယ်အော်တွင် လေဖိအားနည်း ရပ်ဝန်းတစ်ခု အ ဖြစ်ပေါ် လာနိုင်ပြီး မုန်တိုင်းငယ်ဖြစ်လာနိုင်ကြောင်း၊ဒေသအများစုမိုးများနိုင်၍ ရေဘေးသတိပြုကြရန် သတိပေးထားသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)