တော်လှန်ရေးကြာနေသည့်အပေါ် မချင့်မရဲဖြစ်ရကြောင်း ပြည်ထောင်စုဝန်ကြီးချုပ်ပြော
အမျိုးသားညီညွတ်ရေးအစိုးရ(NUG) ကြေညာခဲ့သည့် ပြည်သူ့ခုခံတော်လှန်စစ်သည် မနက်ဖြန် စက်တင်ဘာ ၇ရက်တွင် (၁)နှစ်ပြည့်မည်ဖြစ်ရာ တစ်နှစ်အတွင်း အောင်မြင်မှုများ စိန်ခေါ်မှုများ ထိခိုက်နစ်နာမှုများ ရှိခဲ့ကြောင်း NUG ယာယီသမ္မတ ဒူဝါလရှီးလက ပြောကြားသည်။
“ မိမိတို့အနေနဲ့ အဆိုပါ ထိခိုက်နစ်နာခဲ့မှုများကို သင်ခန်းစာအဖြစ်ယူပြီး စိန်ခေါ်မှုများကို ကျော်လွှားကာ ပြည်သူလူထုများ လိုလားမျှော်မှန်း နေတဲ့ ပန်းတိုင်ကို အမြန်ဆုံးရရှိအောင် ဆက်လက်အားတင်းပြီး ကြိုးစားရမှာ ဖြစ်ပါတယ်’ ဟု ယာယီသမ္မတက ယနေ့ ကျင်းပသည့် အမျိုးသားညီညွတ်ရေးအစိုးရ (၆၆)ကြိမ်မြောက် အစိုးရအဖွဲ့အစည်းအဝေး၌ ပြောကြားခဲ့သည်။
မနက်ဖြန် ကျရောက်မည့် ပြည်သူ့ခုခံတော်လှန်စစ်ကြေညာသည့် တစ်နှစ်ပြည့်၌လည်း နိုင်ငံတော်ယာယီသမ္မတက နိုင်ငံတော်အခြေပြ မိန့်ခွန်းပြောကြားမည်ဖြစ်သည်။
စစ်ကောင်စီအနေဖြင့် အပြစ်မဲ့ ပြည်သူများကို နည်းမျိုးစုံဖြင့် နှိပ်စက်ပြီး တိုင်းပြည်မှ ထွက်ပြေးသွားအောင် နှင်ထုတ်နေသည်ကို တွေ့ရကြောင်း ယာယီသမ္မတက ပြောသည်။
“ကျွန်တော်တို့ အမျိုးသား ညီညွတ်ရေးအစိုးရက နိုင်ငံပြင်ပကို အကြောင်းအမျိုးမျိုးနဲ့ ထွက်ခွာသွားတဲ့ တို့နိုင်ငံသားများကို ကူညီစောက်ရှောက်နိုင်ဖို့ လုပ်ဆောင်ပေး နေတဲ့ အစိုးရဖြစ်ပါတယ်။ ကာကွယ်ပေးဖို့လည်း တာဝန်ရှိ ပါတယ်”ဟု ၎င်းက ဆိုသည်။
ပြည်ထောင်စုဝန်ကြီးချုပ် မန်းဝင်းခိုင်သန်းက ‘ပြည်သူ့ဘဏ္ဍာ တွေကို ကိုယ့်အတ္တအတွက် စိတ်ကြိုက်ချယ်လှယ် ခွင့်ရနေတဲ့ စစ်ကောင်စီဟာ အင်အားစုံသုံးပြီးတာတောင် ပြည်သူတွေရဲ့ ခိုင်မာတဲ့ စိတ်ဓာတ်တွေကို (၁)နှစ်ကျော် ကာလအတွင်း ဖြိုချလို့ မရသေးဘူး။ ဒါကိုကြည့်ရင် ကျွန်တော်တို့ဟာအောင်ပွဲဆီကို လျှောက်လှမ်းနေတယ်ဆိုတာ ငြင်းလို့မရဘူး။ ဒါပေမယ့် ကျွန် တော်တို့ ဒါ့ထက်မြန်မြန် လျှောက်လှမ်းဖို့ လိုတယ်။ တော်လှန်ရေးကြာလေ ပြည်သူနာလေ တိုင်းပြည်နာလေမို့ ဒီလောက်ထိ ရှည်ကြာလာတာကိုတောင် ကျွန်တော်တို့ အနေနဲ့ မချင့်မရဲဖြစ်ရ ပါတယ်။”ဟု ပြောကြားသည်။
တော်လှန်ရေး၌ ပြည်ပအကူအညီ မရသေးသည့် အခြေအနေတွင် ကြိုးစားရှာဖွေပေးနေသည့် စီမံကိန်း၊ ဘဏ္ဍာရေးနှင့် ရင်းနှီးမြှုပ်နှံမှုဝန်ကြီးဌာန၊နည်းလမ်း မျိုးစုံနှင့် တော်လှန်ရေး ရံပုံငွေများ ထည့်ဝင်ပေးနေသည့် ပြည်တွင်းပြည်ပက ပြည်သူများကို အထူးကျေးဇူးတင်ကြောင်း ပြည်ထောင်စုဝန်ကြီးချုပ်က ပြောသည်။
“ဒီတစ်ပတ်အတွင်းမှာ ကျွန်တော်တို့ မဟာမိတ်တချို့နဲ့ ဆွေးနွေးတိုင်ပင်မှုတွေ လုပ်ကြတဲ့အခါမှာလည်း တော်လှန်ရေးအပေါ် ထားရှိတဲ့ သဘောထား တွေက တော့အားလုံးတူညီနေကြတာ တွေ့ရပါတယ်။ ဘုံသဘောတူညီချက်တွေလည်း ရှိကြတာမို့ ခရီး ဆက် ကြရပါမယ်။”ဟုလည်း ပြည်ထောင်စုဝန်ကြီးချုပ်က ပြောကြားသည်။
