ဖားအံမြို့နယ်မှာ နယ်ခြားစောင့်တပ်(BGF) တပ်ဖွဲ့တွေက ဒေသခံရွာလူကြီးတွေကို ခေါ်ယူတွေ့ဆုံပြီး KNU/KNLA အပါအဝင် မိတ်ဖက်တော်လှန်ရေးအဖွဲ့ဝင်တွေ ရွာထဲဝင်ရောက်လာရင် သတင်းပေးပို့ဖို့ ခြိမ်းခြောက်ပြောဆိုခဲ့တယ်လို့ ကေအဲန်ယူက သတင်းထုတ်ပြန်ပါတယ်။
သတင်းမပေးရင် ရွာကို လက်နက်ကြီးနဲ့ ပစ်ခတ်ဖျက်ဆီးမယ်လို့ခြိမ်းခြောက်တယ်လို့လည်းဆိုပါတယ်။
စက်တင်ဘာလ (၄)ရက်က စစ်ကောင်စီလက်အောက်ခံ(BGF – ၁၀၁၄)တပ်ရင်းက ကေအဲန်ယူ-ဖားအံမြို့နယ် တကောင်ဘိုးကျေးနယ်အုပ်စုအတွင်းရှိ တစ်လသူကြီးတွေကို မိတ္ထိလာ(ဘုရားကုန်း) BGF တပ်ခွဲ(၂)စခန်းကို ခေါ်ယူခဲ့တယ်လို့ ထုတ်ပြန်ချက်မှာဖော်ပြထားပါတယ်။
နယ်ခြားစောင့်တပ်က ရွာလူကြီးတွေကို ခေါ်ယူတွေ့ဆုံရာမှဋ KNU/ KNLA နဲ့ မိတ်ဖက်တော်လှန်ရေးအဖွဲ့ဝင်တွေ ကျေးရွာအတွင်း ဝင်ရောက်လာတာကို လက်မခံဖို့၊ ဝင်ရောက်လာခြင်းရှိပါက အချိန်နဲ့တပြေးညီ သတင်းပို့ဖို့နဲ့ သတင်းမပေးပါက ကျေးရွာကို လက်နက်ကြီးနဲ့ ပစ်ခတ်ဖျတ်ဆီးပစ်မယ်လို့ ခြိမ်းခြောက်ပြောဆိုခဲ့တယ်လို့ သိရပါတယ်။
အဲ့ဒီနောက် စက်တင်ဘာလ(၄)ရက်နေ့ ညနေ(၄)နာရီ (၅၀)မိနစ်မှာ (BGF – ၁၀၁၄) တပ်ရင်းရဲ့ ညောင်ကုန်း BGF စစ်ဆေးရေးဂိတ်ကနေ ကျုံခနကျေးရွာထဲကို လက်နက်ကြီးလေးချက်ပစ်ခတ်ခဲ့ပြီး လူနေအိမ်နှစ်လုံး ထိမှန်ပျက်စီးခဲ့တယ်လို့ ကေအဲန်ယူကဆိုပါတယ်။
ဒါ့အပြင် ပြီးခဲ့တဲ့ သြဂုတ်လ(၂၇)ရက်နေ့ ညခုနှစ်နာရီကလည်း ညောင်ကုန်း BGF ဂိတ်က လက်နက်ကြီး (၆၀-မမ)နဲ့ ပစ်ခတ်ခဲ့မှုတွေရှိပြီး ကျုံခနနဲ့ ညောင်ကုန်းရွာကြား ကျရောက်ပေါက်ကွဲခဲ့ကာ အဲ့ဒီနေ့ည (၁၂)နာရီကျော်မှာလည်း ရမ်းသမ်းပစ်ခတ်ခြိမ်းခြောက်မှုတွေရှိခဲ့လို့ ကျုံခနရွာနဲ့ ညောင်ကုန်းရွာကြား(၁၀)လုံး၊ နောနော့ဝါးကျေးရွာထဲ တစ်လုံး ကျရောက်ခဲ့တာဖြစ်ပါတယ်။
အခုလို စစ်ကောင်စီလက်အောက်ခံ BGF ၁၀၁၄ တပ်ရင်းက အပြစ်မဲ့ပြည်သူတွေကို ခေါ်ယူခြိမ်းခြောက်တာ၊ လက်နက်ကြီးတွေနဲ့ ကျေးရွာတွေထဲ ပစ်ခတ်ခြိမ်းခြောက်နေတာတွေကြောင့် ဒေသခံလူထုဟာ ထိတ်လန့်ကြောက်ရွံ့နေကြရတယ်လို့ ကေအဲန်ယူရဲ့ထုတ်ပြန်ချက်အရ သိရပါတယ်။
