ရန်ကုန်မြို့ ရွှေပြည်သာမြို့နယ် အမှတ်(၉)ရပ်ကွက်ရှိ စစ်ကောင်စီခန့်အုပ်ချုပ်ရေးမှူးရုံး ယနေ့ညပိုင်းတွင် ဝင်ရောက်ပစ်ခတ်ခံရပြီး ရာအိမ်မှူးတစ်ဦးသေဆုံးသွားကြောင်း မြေအောက်တော်လှန်ရေးတပ်ဖွဲ့တစ်ဖွဲ့က လူထုနွေဦးသို့ ပြောသည်။
ယနေ့(စက်တင်ဘာ ၆)ည ၇ နာရီ ၄၅မိနစ်ခန့်က (၉)ရပ်ကွက်အုပ်ချုပ်ရေးမှူးရုံးကို တော်လှန်ရေးရဲဘော်များက ဝင်ရောက်ပစ်ခတ်ခဲ့ခြင်းဖြစ်ပြီး ပစ်ခတ်မှုကြောင့် ရာအိမ်မှူး အောင်ထူးဆိုသူသေဆုံးပြီး လေးဦးဒဏ်ရာရသွားသည်ဟု ဆိုသည်။
“အတည်ပြု နေတုန်းပါဗျ။ အောင်ထူးကတော့သေတယ်။ လေးယောက်လဲကျသွားတယ်။ ကျွန် တော်တို့လုပ်ဖို့ရာထားတဲ့ သူပါပဲ။ ဒါပေမဲ့ ကျွန် တော်တို့အဖွဲ့တွေကို ဆက်သွယ်မရသေးလို့ အတိအကျမပြောနိုင်သေးပါဘူး”ဟု ရွှေပြည်သာ မြေအောက်တော်လှန်ရေးအဖွဲ့ SPTUG မှ ရဲဘော်တစ်ဦးက ပြောသည်။
“သေတာက ရာအိမ်မှူးအောင်ထူးလို့ သိရတယ်။ သေနတ်သံတွေက ၁၀ ချက်လောက်ကြားခဲ့ရတာ”ဟု အမှတ်(၉)ရပ်ကွက်နေသူတစ်ဦးက လူထုနွေဦးသို့ ပြောသည်။
အခင်းဖြစ်ပွားရာ နေရာအနီးရှိ တွေ့ရှိသူမှန်သမျှကို အကြမ်းဖက်စစ်ကောင်စီက ဖမ်းဆီးနေကြောင်း ရွှေပြည်သာမြို့နယ် သတင်းပြန်ကြားရေးအဖွဲ့ Spt Information က အသိပေးသည်။
အုပ်ချုပ်ရေးပစ်မှတ်ဖြစ်သည့် (၉)ရပ်ကွက်အုပ်ချုပ်ရေးမှူးရုံးကို ရွှေပြည်သာမြို့နယ်ပြည်သူ့ကာကွယ်ရေးတပ်ဖွဲ့နှင့် YUGA MO 7 Eagles တို့ ပူးပေါင်းပစ်ခတ်ခဲ့ပြီး စစ်ကောင်စီလက်ပါး စေ ရာအိမ်မှူးတစ်ဦးသေဆုံးကာ အခြားရုံးအဖွဲ့ဝင်များ ပြင်းထန်ဒဏ်ရာရရှိခဲ့ကြောင်း ရန်ကုန်မြို့ပြ ပြောက်ကျားတပ်ဖွဲ့ YUGA က ဆိုသည်။
ရဲဘော်များအားလုံးဘေးကင်းပြီဖြစ်ကာ ကျန်ရှိနေသော စစ်ကောင်စီလက်ပါးစေများအားလုံး အလျင်အမြန်နှုတ်ထွက်ရန်လည်း သတိပေးသည်။
ထို့အပြင် ယနေ့ည ၉ နာရီ ၁၀ မိနစ်ခန့်တွင် အမှတ် ၉ ရပ်ကွက် အုပ်ချုပ်ရေးမှူးရုံးကို ပစ် မှတ်ထားသည့် ပေါက်ကွဲမှု တစ်ခုဖြစ်ပွားခဲ့ပြီး ထိခိုက်မှုအခြေအနေကို မသိရသေးပေ။
ရွှေပြည်သာမြို့နယ်မှ အင်းစိန်မြို့နယ်ဘက်သို့ ထွက်ပေါက်ဖြစ်သော တညင်းကုန်းလမ်းဆုံ၊ ရထားသံလမ်းအနီးတွင်လည်းစစ်ကောင်စီအဖွဲ့ကဆိုင်ကယ်များကို ဦးတည်၍ ပိတ်ဆို့စစ်ဆေးနေကြောင်း မျက်မြင်တွေ့ရှိသူများက အတည်ပြုသည်။
