ကရင်အမျိုးသားအစည်းအရုံး(KNU) တပ်မဟာ(၆)နယ်မြေ ကော်ဘရာ စစ်ကြောင်းလှုပ်ရှားရာဒေသသို့ စစ်ကောင်စီတပ်က လက်နက်ကြီးများဖြင့် ဆက်လက်ပစ်ခတ်နေကြောင်း ကော်ဘရာစစ်ကြောင်းက ယနေ့ညပိုင်းတွင် သတင်းထုတ်ပြန်သည်။
စစ်ကောင်စီ၏ တပ်မ(၄၄) လက်အောက်ခံတပ်များသည် မြဝတီ – ဝေါ်လေ လမ်းမအား ဆက်လက်ကျူးကျော်ရန် ကြိုးစားလျက်ရှိပြီး သုံးထပ်ကွေ့အနီး ကျော်ဝါးဘိုး ဘုရားတွင် တပ်စွဲကာ လက်နက်ကြီးများဖြင့် စက်တင်ဘာ ၅ရက်ကတည်းက ပစ်ခတ်နေခြင်းဖြစ်သည်။ စက်တင်ဘာ ၅ရက်နှင့် ၆ရက်က လက်နက်ကြီး ပစ်ခတ်မှုများအတွင်း ကော်ဘရာစစ်သည် နှစ်ဦး ဒဏ်ရာရခဲ့သည်။
ယနေ့တွင်လည်း စစ်ကောင်စီတပ်က (၁၂၀)မမ လက်နက်ကြီးဖြင့် နံနက်ပိုင်းမှ ညပိုင်းအထိလက်နက်ကြီးဖြင့် ရမ်းသမ်းပစ်ခတ်လျက်ရှိရာ အများပြည်သူလူထု သွားလာလျက်ရှိသော လမ်းမကြီး နှင့် တောတောင်ရေမြေ၊ ပြည်သူ့အိုးအိမ်များ ထိခိုက်ပျက်စီး လျက်ရှိကြောင်း ကော်ဘရာ စစ်ကြောင်းက ပြောသည်။ ယနေ့ တိုက်ခိုက်မှုအတွင်း ကော်ဘရာစစ်သည်များ ထိခိုက်မှုမရှိဟု အသိပေးထားသည်။
ကော်ဘရာစစ်ကြောင်းနှင့် စစ်ကောင်စီတပ်တို့ မြ၀တီ -ဝေါ်လေးလမ်းအနီးတဝိုက် ဒေသများ၌ တိုက်ပွဲဖြစ်ပွားနေသည်မှာ ၂လကျော်ကြာပြီဖြစ်သည်။
