မုံရွာ – ချောင်းဦးလမ်းပိုင်း ယာယီပိတ်ထား

စစ်ကိုင်းတိုင်း၊ မုံရွာ – ချောင်းဦးလမ်းပိုင်းအား အရေးပေါ်လိုအပ်ချက်အရ ယနေ့နံနက်ပိုင်းမှစတင်ကာ ယာယီပိတ်ထားလိုက်ကြောင်း ချောင်းဦးမြို့နယ်ပြည်သူ့ကာကွယ်ရေးတပ်ဖွဲ့က ထုတ်ပြန်သည်။

ယနေ့(စက်တင်ဘာ ၈ ရက်) နံနက် ၁၀နာရီမှစတင်ကာ မုံရွာ – ချောင်းဦးလမ်းပိုင်းကိုကြေညာ ချက်ထုတ်ပြန်ချိန်မှစ၍ နောက်ထပ်တစ်စုံတစ်ရာ မထုတ်ပြန်မီအထိ အရေးပေါ်လိုအပ်ချက်အခြေအနေအရ ယာယီပိတ်ထားလိုက်ကြောင်း ချောင်းဦး PDFက အသိပေးသည်။

ယာယီပိတ်ထားချိန်အတွင်း ကြေညာချက်ပါလမ်းပိုင်းကို ဒေသခံပြည်သူတို့၏ လုံခြုံရေးအတွက် လုံးဝအသုံးမပြုကြပါရန်နှင့် လိုက်နာခြင်းမရှိသူတို့၏ လုံခြုံရေးအတွက် အာမမခံပါကြောင်းထုတ်ပြန်ချက်တွင် ဖော်ပြထားသည်။

အထက်ပါလမ်းပိုင်းတွင် သွားလာနေကြသော မော်တော်ယာဉ်များအနေဖြင့် အန္တရာယ်ကင်းရှင်းစေရန်အတွက် ရောက်ရာအရပ်တွင် ခေတ္တရပ်နားထားကြပါရန်နှင့် အဆိုပါ လမ်းပိုင်းကိုလက်ရှိအသုံးပြုလျက်ရှိသော မိမိ၏ဆွေမျိုးမိတ်ဆွေများကို ထပ်ဆင့်အကြောင်းကြားပေးကြပါရန် ချောင်းဦး PDFက မေတ္တာရပ်ခံထားသည်။

အလားတူ မုံရွာ – မန္တလေးလမ်းမကြီး၏မုံရွာ – မြင်းမူ လမ်းပိုင်းတွင်လည်း အရေးပေါ်အခြေအနေမှလွဲ၍ ဖြတ်သန်းသွားလာခြင်းမပြုကြရန် Pdf- South Monywa က သတိပေးသည်။

မုံရွာ – မြင်းမူ လမ်းပိုင်းအား မဖြစ်မနေ အသုံးပြုရမည်ဆိုပါက ကားမှန်များချ၍ သင့်တင့်သောအရှိန်ဖြင့်သာ မောင်းနှင်ပေးကြရန်PDF-South Monywaက အသိပေးသည်။

မုံရွာ – မန္တလေးလမ်းမကြီးပေါ်တွင် စစ်ကောင်စီယာဥ်တန်းများ ဖြတ်သန်းသွားတိုင်း လမ်းတစ် လျှောက်ရှိ ဒေသတွင်းပြည်သူ့ကာကွယ်ရေးအဖွဲ့များက မိုင်းဆွဲတိုက်ခိုက်လေ့ရှိသည်။