အမျိုးသားပြန်လည်သင့်မြတ်ရေးကို အန္တရာယ်ဖြစ်စေမည့် လုပ်ရပ်များကို ရှောင်ရှားရန် စစ်ကောင်စီကို စင်ကာပူဝန်ကြီးချုပ်နှင့် ဖိလစ်ပိုင်သမ္မတတို့က ပူးတွဲထုတ်ပြန်သည်။
စင်ကာပူသို့ နိုင်ငံတော်အဆင့်သွားရောက်သည့် ဖိလစ်ပိုင်သမ္မတ၏ ခရီးစဉ်အတွင်း ခေါင်းဆောင်နှစ်ဦးက ပူးတွဲထုတ်ပြန်ခဲ့ခြင်းဖြစ်ပြီး သက်ဆိုင်ရာပါဝင်ပတ်သက်သူများနှင့် အပြုသဘောတွေ့ဆုံဆွေးနွေးရေး အာဆီယံအထူးကိုယ်စားလှယ်၏ ကြိုးပမ်းချက်ကို ပူးပေါင်းဆောင်ရွက်ခြင်းမရှိမှု အပါအဝင် မြန်မာစစ်အာဏာပိုင်များကအာဆီယံ သဘောတူညီချက်၅ရပ်ကိုအချိန်နှင့်တပြေးညီအကောင်အထည်ဖော်ရေး ကတိမတည်မှုနှင့် တိုးတက်မှုနှေးကွေးသည့်အပေါ် လွန်စွာစိတ်ပျက်ကြောင်း ဖော်ပြသည်။
မကြာသေးမီက အတိုက်အခံတက်ကြွလှုပ်ရှားသူ လေးဦးကို ကွပ်မျက်ခြင်းနှင့် နိုင်ငံအတွင်း ရှည်ကြာနေသော နိုင်ငံရေးအကျပ်အတည်းအပါအဝင် မြန်မာ့အရေးကို လွန်စွာစိုးရိမ် ကြောင်းလည်း ခေါင်းဆောင်နှစ်ဦးက ပူးတွဲထုတ်ပြန်သည်။
နိုင်ငံတော်သမ္မတဦးဝင်းမြင့်၊ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် နှင့် နိုင်ငံခြားသားများအပါအဝင် နိုင်ငံရေးအကျဉ်းသားအားလုံးကို ပြန်လွှတ်ပေးရန် ခေါင်းဆောင် နှစ်ဦးက တောင်းဆိုသည်။
စင်ကာပူဝန်ကြီးချုပ်နှင့် ဖိလစ်ပိုင်သမ္မတတို့သည် မြန်မာ့အရေးတွင် ကုလသဂ္ဂ၏ ပါဝင်ညှိနှိုင်းပေးမှု၊ ကုလအထူးကိုယ်စားလှယ်၏ လုပ်ဆောင်မှုတို့ကိုလည်း အားပေးထောက်ခံကြောင်း ထပ်လောင်းအတည်ပြုသည်။ ကုလသဂ္ဂကိုယ်စားလှယ်များနှင့် အေဂျင်စီများကို မြန်မာနိုင်ငံသို့ အပြည့်အ၀ဝင်ရောက်သွားလာနိုင်ရေးကိုလည်း တောင်းဆိုသည်။
