ငွေလွဲ၊ငွေထုတ်ရာတွင် မှတ်ပုံတင်မဖြစ်မနေယူလာရမည်ဟု Wave Money ဆို

Wave Money ဆိုင်များမှ ငွေလွဲ၊ငွေထုတ် ဝန်ဆောင်မှုများအတွက် မှတ်ပုံတင်မဖြစ်မနေ ယူဆောင်လာပြီး အချက်အလက်အပြည့်အစုံဖြည့်တင်းရမည်ဟု Wave Money မိုဘိုင်းငွေရေးကြေးရေးကုမ္ပဏီက ယနေ့ ထုတ်ပြန်လိုက်သည်။

စစ်ကောင်စီက မိုဘိုင်းဖုန်းအသုံးပြု ငွေရေးကြေးရေးကုမ္ပဏီများအား ငွေလွဲ၊ ငွေထုတ်သူများ​၏ ကိုယ်ရေးအချက်အလက်ရယူရန်နှင့် ဓာတ်ပုံခိုးရိုက်ထားရန်ဟူသော အစရှိသည့် စည်းကမ်းများတင်းကြပ်ပြီးနောက် Wave Moneyကုမ္ပဏီဘက်က ယနေ့ ထုတ်ပြန်လိုက်ခြင်းဖြစ်သည်။

“ယခုကစပြီး ပိုမိုလုံခြုံစိတ်ချရသော Wave Money ငွေလွဲခြင်း၊ ငွေထုတ်ခြင်း လုပ်ငန်းများအားလုံးအတွက် မှတ်ပုံတင် ယူဆောင်လာဖို့ လုံးဝ(လုံးဝ) မမေ့ကြနဲ့နော်”ဟု Wave Money က ဆိုသည်။

ငွေလွဲ/ငွေထုတ်ပြုလုပ်ရာတွင် မှတ်ပုံတင်ယူရမည်ဟူသော ကြေညာချက်ကို Wave Money ကုမ္ပဏီတစ်ခုကသာ ထုတ်ပြန်ကြေညာခဲ့ပြီး အခြားမိုဘိုင်းငွေရေးကြေးရေးလုပ်ငန်းဖြစ်သည့် Kpay ၊ True Moneyစသည့်တို့က ထုတ်ပြန်ကြေညာခြင်းမရှိသေးပေ။