စစ်ကောင်စီတပ် ဗိုလ်ကြီးတစ်ဦးအပါအဝင် သေဆုံးသူများဟုဆို
မန္တလေးတိုင်း၊ မတ္တရာမြို့နယ် ဧရာဝတီမြစ်အတွင်းရှိ ရေလယ်ကျွန်းကျေးရွာတွင် ယနေ့နံနက်ပိုင်းက စစ်ကောင်စီတပ်နှင့် တိုက်ပွဲဖြစ်ပွားနေပြီး စစ်ကောင်စီတပ်ဘက်က ဗိုလ်ကြီးတစ်ဦးအပါအဝင် ထိခိုက်သေဆုံးသူများပြားကြောင်း ဗိုလ်ကောင်းကင်တော်လှန်ရေးအင်အားစုက အသိပေးထုတ်ပြန်သည်။
ယနေ့(စက်တင်ဘာ ၉ ရက်) နံနက်ပိုင်းက မတ္တရာမြို့နယ်၊ ဧရာဝတီမြစ်အတွင်း ရေလယ်ကျွန်းကျေးရွာအား စစ်ကောင်စီတပ်က ဝင်ရောက်စီးနင်းပစ်ခတ်ခဲ့ရာ ပြည်သူ့ကာကွယ်ရေးအဖွဲ့များနှင့် တိုက်ပွဲဖြစ်ပွားခဲ့ခြင်းဖြစ်ကြောင်း ဗိုလ်ကောင်းကင်တော်လှန်ရေးအင်အားစုက အသိပေးသည်။
![ခေါင်းထိမှန်ဒဏ်ရာရသွားသော ကလေးငယ်အား တွေ့ရစဥ်၊ ဓာတ်ပုံ-ဗိုလ်ကောင်းကင်](https://i0.wp.com/www.ludunwayoo.com/wp-content/uploads/2022/09/302200496_461886876000770_6381610744770202663_n.png?resize=461%2C1024&ssl=1)
စစ်ကောင်စီတပ်၏ ပစ်ခတ်မှုကြောင့် ၎င်းကျေးရွာနေ ကလေးတစ်ဦး ခေါင်းထိမှန်ပြီး အမျိုးသမီးတစ်ဦးလည်း ခြေထောက်ထိမှန်ခဲ့ကြောင်း၊ခေါင်းထိ ကလေးငယ်မှာ စိုးရိမ်ရသည့်အခြေအနေဟု ဗိုလ်ကောင်းကင်တော်လှန်ရေးအင်အားစုက ဆိုသည်။
ယနေ့တိုက်ပွဲတွင် စစ်ကောင်စီဘက်က ဗိုလ်ကြီးတစ်ဦး အပါအဝင် ၁၃ ဦး သေဆုံးကြောင်း ဗိုလ်ကောင်းကင်တော်လှန်ရေးအင်အားစုက ပြောသည်။
ဖြစ်စဥ်နှင့်ပတ်သက်၍ ဗိုလ်ကောင်းကင်တော်လှန်ရေးအင်အားစုအဖွဲ့ တာဝန်ရှိသူက “မနက် ၅ နာရီလောက် စက်လှေနဲ့ ဝင်လာတာ ကျနော်တို့ ဘက်က စပစ်ပါတယ်။ လက်နက်အင်အားမမျှလို့ ဆုတ်ပေးခဲ့ရပါတယ်။ မြစ်အရှေ့ဘက် ရှင်လှကျေးရွာဘက်ကနေ စက်လှေနဲ့ကူးပြီး နာရေးကား ၃စီးနဲ့ တင်သွားတာ ပြည်သူတွေ သေချာကြည့်မြင်ရပါတယ်။သတင်းသေချာခိုင်လုံပါတယ်။ ဗိုလ်ကြီးတစ်ဦး လဲသေချာတယ်ဗျ။ အဖမ်းခံရတဲ့ သူလွတ်လာပြီးဗိုလ်ကြီးအမြန်ပို့ ထိပြီလို့ ပြောတာမြင်လိုက်တဲ့ မျက်မြင်ရှိပါတယ်။”ဟု ပြောသည်။
![ခေါင်းထိမှန်ဒဏ်ရာရသွားသော ကလေးငယ်အား တွေ့ရစဥ်၊ ဓာတ်ပုံ-ဗိုလ်ကောင်းကင်](https://i0.wp.com/www.ludunwayoo.com/wp-content/uploads/2022/09/302280867_461887036000754_8113839804758812733_n.jpg?resize=534%2C1024&ssl=1)
အဆိုပါ ရေလယ်ကျွန်းကျေးရွာတွင် ပြီးခဲ့သည့် ဇူလိုင် ၂၇ ရက်မှ ဩဂုတ် ၁ရက်အထိ စစ်ကောင်စီတပ်နှင့် ဒေသတွင်းပြည်သူ့ကာကွယ်ရေးအဖွဲ့များ ငါးရက်ဆက်တိုက်ပွဲ ဖြစ်ပွားခဲ့သည်။
အဆိုပါတိုက်ပွဲအတွင်း စစ်ကောင်စီတပ်၏ ပစ်ခတ်မှုကြောင့် မြစ်အနောက်ဘက်ခြမ်း စစ်ကိုင်းမြို့နယ် စဉ့်ကိုင်(တောင်)ရွာရှိ ဆရာတော်တစ်ပါး လက်နက်ကြီးထိမှန် ပျံလွန်တော်မူခဲ့ပြီး ဒေသခံရွာသားတစ်ဦးလည်း ထိခိုက်ဒဏ်ရာရရှိခဲ့သည်။
ငါးရက်ဆက်တိုက်ပွဲအတွင်း စစ်ကောင်စီတပ်ဘက်က ရှစ်ဦးထက်မနည်း သေဆုံးခဲ့ကြောင်း ဒေသတွင်း ပြည်သူ့ကာကွယ်ရေးအဖွဲ့များက သတင်းထုတ်ပြန်ခဲ့သည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)