စစ်ကိုင်းတိုင်း၊ ဆားလင်းကြီးမြို့နယ်၊ ဝမ်ပေါင်ကုမ္ပဏီမှ မုံရွာအနောက်မြောက်တိုင်းစစ်ဌာနချုပ် (နမခ)သို့ ကြေးနီများသယ်ဆောင် ထွက်ခွာလာသော စစ်ကောင်စီယာဥ်တန်း ယမန်နေ့မွန်းလွဲပိုင်းက မိုင်းဆွဲတိုက်ခိုက်ခံခဲ့ရကြောင်း သတင်းရရှိသည်။
ယမန်နေ့ (စက််တင်ဘာ ၈ ရက်) မွန်းလွဲ ၁နာရီ ကျော် က ဝမ်ပေါင်ကုမ္ပဏီမှ ကြေးနီများ သယ်ဆောင်လာသော ယာဉ်ကြီး ခြောက်စီးကို ကောင်းခန့်ဆီဆိုင်အနီးတွင် မိုင်းဆွဲတိုက်ခိုက်ခဲ့ကြောင်း Brother Defense Force အဖွဲ့က သတင်းထုတ်ပြန်သည်။
“ကားကြီးမှာ အနားတင်ထိုးရပ်သွားပြီး ဘယ်လောက်သေဆုံးတယ် ဘယ်လိုအခက်ခဲဖြစ်သွားမလဲဆိုတာကိုတော့မြေပြင်သတင်းအခက်အခဲများကြောင့် အတိအကျမသိရသေးပါဘူးခင်ဗျာ။ မိဘပြည်သူများကိုချက်ချင်းတင်ပြနိုင်ခြင်းမရှိသည်မှာရဲဘော်များရဲ့လုံခြုံရေးကြောင့်ဖြစ်ပါသည်ခင်ဗျာ။”ဟု Brother Defense Force အဖွဲ့၏ ထုတ်ပြန်ချက်တွင် အသိပေးသည်။
ဖြစ်စဥ်နှင့်ပတ်သက်၍ Brother Defense Force အဖွဲ့ထံ ဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပေ။
လက်ပတောင်းတောင်ဝမ်ပေါင်ကုမ္ပဏီမှ ကြေးနီတွဲကားများသည် ယမန်နေ့ ညနေ ၅ နာရီခန့်ကလည်း မုံရွာ(နမခ)ဘက်သို့ သယ်ဆောင်သွားကြောင်း ချင်းတွင်းရိုးမ မဟာမိတ်တပ်ပေါင်းစုက ပြောသည်။
ကြေးနီများအား ၃ ရက်သယ်မည်ဟု သတင်းရရှိပြီး သယ်ဆောင်ချိန်အတွင်း ညောင်ပင်ကြီးကူးတို့ဆိပ်မှ အင်အား ၃၀၊ ယင်းမာပင်ရဲတပ်ရင်းမှ အင်အား ၂၀ တို့ ပူးပေါင်းပြီး ဝမ်ပေါင်ကုမ္ပဏီမှ ပုသိမ်မုံရွာလမ်းတစ်လျှောက် ရွှေတောင်ဦးကုန်းအထိ လုံခြုံရေးယူထားကြောင်း၊ ဒေသခံပြည်သူများလည်း အိုးအိမ်စွန့်ခွာထွက်ပြေးတိမ်းရှောင်နေရကြောင်း ချင်းတွင်းရိုးမ မဟာမိတ်တပ်ပေါင်းစုက အသိပေးသည်။
လက်ပတောင်းတောင် ကြေးနီစီမံကိန်းမှ ကြေးနီတင်ယာဥ်များသည် မြစ်တစ်ဖက်ကမ်းရှိ မုံရွာ အနောက်မြောက်တိုင်းစစ်ဌာနချုပ်ဝင်းအတွင်းသို့ သယ်ဆောင်လေ့ရှိပြီး ယခင်ကလည်း မိုင်းဆွဲတိုက်ခိုက်ခံခဲ့ရဖူးသည်။
