ထိုင်းနိုင်ငံ၊ အုန်းရိုင်ရှိ Big C ကုန်တိုက်အနီး အထည်ချုပ်စက်ရုံတစ်ရုံတွင် အလုပ်လုပ်ကိုင်နေသော မြန်မာလုပ်သား ၂၀၀ကျော် အကြောင်းမဲ့ အလုပ်ထုတ်ပယ်ခံရမှုကြောင့် နစ်နာကြေးပေးရန်ဆန္ဒပြတောင်းဆိုရာ ပြေလည်မှုမရှိ၍ ယင်းစက်ရုံပိုင်ရှင်ကို တရားစွဲဆိုထားကြောင်း အဆိုပါစက်ရုံလုပ်သားများအရေး ကူညီပေးနေသည့် ကိုရဲမင်း(AAC မဟာမိတ်)က ပြောသည်။
အဆိုပါ အထည်ချုပ်အလုပ်ရုံတွင် မြန်မာလုပ်သား ၂၀၃ဦး အလုပ်လုပ်ကိုင်နေပြီး နှစ်နိုင်ငံသဘောတူစာချုပ်(MoU)စနစ်ဖြင့် မြန်မာလုပ်သားများအား အစားထိုးခန့်မည်ဆိုကာ အလုပ်မှ ထုတ်ပယ်ခြင်း ဖြစ်ကြောင်း ကိုရဲမင်းက ပြောသည်။
ယင်းစက်ရုံတွင် လုပ်ကိုင်နေကြသော မြန်မာလုပ်သားများသည် ပန်းရောင်ကတ်ကိုင်ဆောင်ပြီး တရားဝင် အလုပ်လုပ်ကိုင်နေသူများဖြစ်ရာ လုပ်သက်ပြည့် ဝန်ထမ်းများလည်း ဖြစ်သည်ဟု ဆိုသည်။
ထို့အပြင် စက်ရုံပိုင်ရှင်က နစ်နာကြေးပေးဆောင်ခြင်းမရှိဘဲ အလုပ်မှထုတ်ပယ်ခြင်းကြောင့် မြန်မာလုပ်သားများက တရားစွဲဆိုခြင်းဟု ကိုရဲမင်းက ပြောသည်။
“အလုပ်ထုတ်ခံရသူတွေမှာ ပန်းရောင်ကတ်တင်ထားသူတွေပါတယ်။ အလုပ်ပြောင်းရွှေ့ဖို့အတွက် စာရွက်စာတန်းတွေ ကိစ္စတွေပါတယ်။ အဲဒီကိစ္စတွေကို ပထမတော့ ၂လအတွင်းပေးမယ်လို့ ပြောထားတာ။ အခုကြတော့ ထိုင်းအာဏာပိုင်တွေနဲ့အတူ ချိတ်ဆက်ကူပေးတဲ့အခါမှာ တစ်ပတ်အတွင်းကို စာရွက်စာတန်းတွေ ၊အလုပ်သမားတွေ အဆင်ပြေအောင်လုပ်ပေးမယ်။ ဒါပေမယ့် အလုပ်ပြုတ်သွားတဲ့သူတစ်ဦးကို တစ်လစာ ဘတ်တစ်သောင်းကျော်ပေးရမှာကို ဘတ်နှစ်ထောင်ပဲပေးတယ်။ အဲဒီလိုပေးလို့ အလုပ်သမားတွေက ကျေနပ်မှုမရှိဘူး။ အဲဒါကြောင့် တရားစွဲတာ”ဟု ၎င်းက ပြောသည်။
စက်တင်ဘာ၈ရက်တွင် အဆိုပါ စက်ရုံလုပ်သားများက စက်ရုံရှေ့၌ ဆန္ဒပြတောင်းဆိုခဲ့ကြသည်။
အလုပ်ထုတ်ခံရသည့် လုပ်သားများအရေး ထိုင်းအာဏာပိုင်များနှင့် ချိတ်ဆက်ကူညီပေးနေကြောင်းလည်း ကိုရဲမင်းက ပြောသည်။
ထိုင်းနိုင်ငံတွင် လုပ်သားလိုအပ်ချက်ဖြည့်တင်းရန်ဟုဆိုကာ နှစ်နိုင်ငံသဘောတူစာချုပ် (MoU)စနစ်ဖြင့် မြန်မာလုပ်သားများကို ယခုနှစ် မေလ ၁၀ရက်က စတင်လက်ခံခေါ်ယူခဲ့ပြီး ထောင်နှင့်ချီပေးပို့ စေလွှတ်ထားသည်။
