ပူးပါင်းတပ်မှ ပြည်သူ့ရဲဘော်နှစ်ဦး ကျဆုံးခဲ့ရ၊ စစ်ကောင်စီတပ်၏ လက်နက်ခဲယမ်းများ သိမ်းဆည်းရမိ
မိုးဗြဲမြို့တိုက်ပွဲ လေးရက်မြောက်နေ့တွင် စစ်ကောင်စီတပ်သား ၂၀ ကျော်ထပ်မံသေဆုံး ပြီး သေနတ်များနှင့် ကျည်ဆည်ခဲယမ်းများထပ်မံသိမ်းဆည်းရရှိကြောင်း ကရင်နီအမျိုးသားများ ကာကွယ်ရေးတပ်(KNDF) က ထုတ်ပြန်သည်။
ယနေ့(စက်တင်ဘာ ၁၁ ရက်)နံနက် ၇နာရီမှစ၍ မိုးဗြဲမြို့ ပွဲကုန်း (၃)ရပ်ကွက် ဘုရားကျောင်းဝန်းအနီး (၄)ရက်တိုင် တပ်စွဲရန်ကြိုးပမ်းနေသော အကြမ်းဖက်စစ်ကောင်စီတပ်များအား KNDF B/03 ၊ B/11 ၊ KA ၊ မိုးဗြဲ PDF ၊ ဖယ်ခုံ PDF ၊ KRU တို့ပူးပေါင်း၍ တစ်နေကုန်နီးပါး ခုခံတိုက်ခိုက်ခဲ့သည်ဟု ဆိုသည်။
တစ်နေကုန်နီးပါး ဖြစ်ပွားခဲ့သော ထိတွေ့တိုက်ပွဲအတွင်း ပူးပေါင်းတပ်များမှ စစ်ကောင်စီတပ်ဖွဲ့များအား ပိတ်ဆို့ကာ ချေမှုန်းတိုက်ခိုက်ခဲ့ခြင်းကြောင့် စစ်ကောင်စီဖက်မှ ၂၀ကျော် သေဆုံး၍ ထိခိုက်ဒဏ်ရာရရှိသူများပြားခဲ့ပြီး ပူးပေါင်းတပ်ဘက်မှ ရဲဘော် နှစ်ဦးမြင့် မြတ်စွာကျဆုံးခဲ့ရကြောင်း အသိပေးသည်။
တိုက်ပွဲအတွင်း သေဆုံးစစ်ကောင်စီတပ်သားများ၏ လက်နက်များအား ကောက်ယူရန် ခက်ခဲခဲ့သောကြောင့် ၎င်းသေဆုံးတပ်သားအချို့ ကိုင်ဆောင်ခဲ့သော လက်နက်များထဲမှ MA-1 သေ နတ် (၁)လတ် ၊ MA-3 သေနတ် (၂)လက် ၊ RPG သီးများ ၊ (၆၀)မမအသီများ ၊ ဆက်သွယ်ရေး အထိုင်စက် (၁)လုံး ၊ ကျည်ဆံများနှင့် အသုံးအဆောင်များကိုသာ သိမ်းဆည်းရခဲ့သည်။
ထို့အပြင် ယခင်ရက်ပိုင်းများက တိုက်ပွဲများတွင် လည်း အကြမ်းဖက်စစ်ကောင်စီတပ်မှ သေဆုံးသူ ၄၀ ထက်မနည်းရှိပြီး MA1 – ၂ လက်၊ MA2 – ၃ လက်၊ MA3 – ၄ လက်၊ ငါးကြင်းမှီး – ၁ လက်၊ ကျည်ဘောက် ၂၃ ဘောက်၊ 79 အသီး ၁၂ လုံး၊ လက်ပစ်ဗုံး ၅ လုံး၊ နင်းမိုင်း ၂ လုံး၊ (၆၀) မမ ၃၃ လုံး၊ RPGအသီး ၁၀ လုံး၊ ငါးကြင်းမှီးကျည် ၃၂၆ ထောင့်၊ M16 ကျည် ၂,၀၈၀ ထောင့် သိမ်းဆည်းရရှိထားသည်။
တိုက်ပွဲအတွင်း အထိနာခဲ့သော အကြမ်းဖက်စစ် ကောင်စီမှ တစ်နေကုန်နီးပါး လက်နက်ကြီးများကို အလွန်အကျွံအသုံးပြုပစ်ခက်ခဲ့သလို ညနေပိုင်းတွင်လည်း တိုက်လေယာဥ် ဖြင့် (၂) ကြိမ် လာရောက်ပစ်ခက်ခဲ့ပြီး ပြည်သူလူထု၏ နေအိမ်အများအပြားလည်း ထိခိုက်ပျက်ဆီးမှုများရှိခဲ့ကြောင်းဖော်ပြသည်။
မိုးဗြဲမြို့တွင် စက်တင်ဘာ ၈ရက်စ၍ ယနေ့ထိ (၄) ရက်တိုင် အကြမ်းဖက်စစ်ကောင်စီနှင့် ကရင်နီပူးပေါင်းတပ်များအကြား ထိတွေ့တိုက်ပွဲများ နေ့စဥ်ဖြစ်ပွားနေဆဲဖြစ်၍ မြို့အနီး ဖြတ်သန်းသွားလာခြင်းကို မပြုလုပ်ရန် ပြည်သူများအား KNDFက တိုက်တွန်းသည်။
