စစ်ကိုင်းတိုင်း၊ ရွှေဘိုမြို့နယ်အတွင်းရှိ Non-CDM ဝန်ထမ်းများအနေဖြင့် CDM ပြုလုပ်အလင်းဝင်ရန် ရွှေဘိုမြို့နယ် ပြည်သူ့အုပ်ချုပ်ရေးအဖွဲ့က ထုတ်ပြန် ကြေညာသည်။
အမျိုးသားညီညွတ်ရေးအစိုးရ (NUG)၏ လက်အောက်ရှိ ရွှေဘိုမြို့နယ် ပြည်သူ့အုပ်ချုပ်ရေးအဖွဲ့က ယမန်နေ့ (စက်တင်ဘာ ၁၁ ရက်)တွင် Non-CDM များနှင့်ပတ်သက်၍ ကြေညာချက် ထုတ်ပြန်ခဲ့သည်။
အဆိုပါ ကြေညာချက်တွင် Non-CDM များ CDM ပြုလုပ်ရန် အကြိမ်ကြိမ် သတိပေးနှိုးဆော်ခဲ့ပြီး ယခုထုတ်ပြန်ချက်ဖြင့် Non-CDM များ အလင်းဝင်ရန် ထပ်မံသတိပေး ဖိတ်ခေါ်ကြောင်း ရေးသားထားသည်။
ယနေ့အထိ Non-CDM များသည် NUG အစိုးရထံ ပူးပေါင်းခြင်း၊ ပြည်သူ့ရင်ခွင်ထံ ခုလှုံခြင်း၊ တော်လှန်ရေးအင်အားစုများနှင့် လက်တွဲခြင်းမပြုဘဲ စစ်ကောင်စီအလိုကျ တာဝန်ထမ်းဆောင်ခြင်းများ ရှိနေဆဲဖြစ်ကြောင်း၊ အလင်းဝင်မည်ဆိုပါက အနာဂတ်ဝန်ထမ်းဘဝ ရပ်တည်ရေးအတွက် ထည့်သွင်းစဥ်းစားပေးမည်ဖြစ်ကြောင်း ထုတ်ပြန်ချက်တွင် ဖော်ပြသည်။
အလင်းဝင်ခြင်းမရှိဘဲ အကြမ်းဖက်စစ်ကောင်စီနှင့် ပူးပေါင်းမြဲဆိုပါက အကြမ်းဖက်ဝန်ထမ်းအဖြစ် သက်မှတ်မည်ဖြစ်ပြီး အလင်းဝင်ရန် ဖိတ်ခေါ်ခြင်းကို မလိုက်နာပါက တရားဥပဒေအရ ပြင်းပြင်းထန်ထန် အရေးယူဆောင်ရွက်တော့မည်ဟု ရွှေဘိုမြို့နယ် ပြည်သူ့အုပ်ချုပ်ရေးအဖွဲ့က သတိပေးထားသည်။
စစ်ကိုင်းတိုင်း၊ ရွှေဘိုမြို့နယ်သည် စစ်ကောင်စီတပ်အား ခုခံတော်လှန်မှုအားကောင်းရာဒေသဖြစ်ပြီး စစ်ကောင်စီတပ်၏ ဖမ်းဆီးအကြမ်းဖက်မှုများလည်း မကြာခဏကြုံနေရသည်။
