လွိုင်ကော်မြို့အထွက် ကယန်းသာယာလမ်းဆုံအနီး တိုက်ပွဲဖြစ်ပွားနေ၍ လမ်းပိုင်းများသွားလာခြင်းမပြုရန် ကရင်နီအမျိုးသားများကာကွယ်ရေးတပ် (KNDF) တပ်ရင်း -၂က ထုတ်ပြန်သည်။
ယနေ့(စက်တင်ဘာ ၁၂ ရက်) နံနက် ၉နာရီခန့်ကစ၍ အကြမ်းဖက်စစ်ကောင်စီတပ်နှင့် ထိတွေ့မှု စတင် ဖြစ်ပွားနေခြင်းဟု ဆိုသည်။
ထို့ကြောင့် ပြည်သူများအနေဖြင့် ကယန်းသာ ယာသို့ဖြတ်သောလမ်းမကြီးနှင့် လမ်းပိုင်းများကိုအသုံးမပြုကြရန်နှင့် တိုက်ပွဲသတင်းများကို နားစွင့်ရန် KNDF တပ်ရင်း (၂)က တိုက်တွန်းသည်။
“ဒီလ ၉ ရက် နေ့ကတည်းက လွိုင်ကော်မှာလည်း တိုက်ပွဲ ပြန်ဖြစ်လာတယ်။အဓိကတော့ စကစ ဘက်က စစ်ကြောင်း တပ်ဖြန့်လာတာလို့ သိရတယ်”ဟု ကရင်နီစစ်ရေးသတင်းရင်းမြစ်က ပြောသည်။
ထို့အပြင် လက်ရှိစစ်ရေးအခြေအနေကြောင့် လွိုင်ကော် – မော်ချီး လမ်းပိုင်းကိုလည်း တစ်ပတ်လျှင် တနင်္လာ၊အင်္ဂါနှင့် ဗုဒ္ဓဟူး သုံးရက်သာလမ်းဖွင့်မည်ဟု ကရင်နီပြည်အစိုးရ၊ပြည်ထဲရေးဝန်ကြီးဌာနက ထုတ်ပြန်ထားသည်။
အလားတူ ရှောင်တခင် စစ်ဆေးမှုများ ပြုလုပ်မည်ဖြစ်ပြီး ကန့်သတ်ကုန်ပစ္စည်းများတွေ့ရှိပါက ယာဥ်ကိုပါ သိမ်းဆည်းအရေးယူမည်ဟု သတိပေးသည်။
