ချင်းပြည်နယ် ထန်တလန်မြို့နယ်ရှိ ကျေးရွာလေးတစ်ရွာက ချင်းဒေသကာ ကွယ်ရေးတပ်(CDF) ရဲဘော်များအတွက် သီးနှံများပေးအပ်ခဲ့ပြီး ကျည်ဖိုးအဖြစ် ကျပ် ၁၂သိန်း လှူဒါန်းလာကြောင်း ထန်တလန် CDFက အသိပေးသည်။
မြန်မာ – အိန္ဒိယနယ်စပ်ရှိ ရွာလေးတစ်ရွာမှ ဘာသာရေးဆရာတစ်ပါးက ဖိတ်ကြား၍ CDF ရဲဘော်များက သွားရောက်ခဲ့ရာ ရွာသူ၊ရွာသားများက ဘုရားကျောင်းပလ္လင်ရှေ့၌ ကောက်သစ်စသီးနှံများ ပေးလှူခဲ့သည်ဟု ဆိုသည်။
“CDF Sunday တဲ့။ CDF Sunday ဆိုတော့ ကျွန်တော်လည်း ပလ္လင်ပေါ်တက်ပြီးစကားအနည်းငယ်ပြောဖြစ်ပါတယ်။ ဘုရားကျောင်းပလ္လင်ရှေ့မှာ ရွာသူရွာသားအားလုံးက ကောက်သစ်စသီးနှံတွေပေးလှူကြတာ။ ဘုရားကျောင်းလည်းပြီးရော ပေးလှူသမျှသီးနှံအားလုံးစခန်းကိုပေးပို့ဖို့စီစဉ်ကြရော။ ပျော်လို့မဆုံး”ဟု ထန်တလန် CDFက ဖော်ပြထားသည်။
“ပေးလှူသမျှသီးနှံအားလုံးစခန်းကိုပေးပို့ဖို့စီစဉ်ကြရော။ ပျော်လို့မဆုံး။ ဘုရားကျောင်း အစီအစဉ်ပြီးတော့ စီစဉ်ထားတဲ့အတိုင်း ရွာထဲမှာတစ်အိမ်တက်တစ်အိမ်ဆင်း ‘တစ်အိမ်ထောင်၊ ကျည်တစ်တောင့်ကမ်ပိန်း’ အတွက် လှည့်ပတ်တာ အိမ်ခြေ ၅၀ တောင်မရှိတဲ့ရွာလေးက ၁၂ သိန်းပေးတာတဲ့။ မျက်ရည်တွေဝဲ”ဟု ထပ်မံအသိပေးထားသည်။
ပြည်သူများ၏ပါဝင်မှုက စစ်ကို အမြန်ဆုံးနိုင်ချင်ပြီဆိုသည့် အတွေးဝင်လာရကြောင်း ထန်တလန် CDF တပ်ရင်း(၄)မှ ဆလိုင်း၏ ရေးသားချက်ကို ဖော်ပြခဲ့သည်။
“တစ်ချို့က ‘တစ်အိမ်ထောင်၊ကျည်တစ်တောင့်ကမ်ပိန်း’ မှာ မင်းတို့ပစ်တာလွဲမှာစိုးလို့ နောက်တစ်တောင့်အတွက်တဲ့….။ ကျည်ငါးတောင့်စာ (၅၀၀၀၀) ပါဝင်တဲ့သူတွေလည်းရှိပြန်။ ရယ်လည်းရယ်ရ၊ မျက်ရည်လည်းဝဲနေရနဲ့။ ဒါမှပြည်သူ့တော်လှန်ရေးပေါ့။ ပြည်သူချစ်တဲ့ရဲဘော်၊ ပြည်သူကျွေးတဲ့စစ်သား၊ ပြည်သူကပေးလိုက်တဲ့ ကျည်ဆံနဲ့စစ်တိုက်နေရပါလားဆိုပြီး ရဲဘော်တွေနဲ့ကျေနပ်စွာ စခန်းဘက်ကိုဦးတည်လာခဲ့သည်”ဟု ထန်တလန် CDF က ဖော်ပြထားသည်။
ထန်တလန် CDF အနေဖြင့် ချင်းအမျိုးသားတပ်မတော်(CNA) အပါအဝင် ဒေသတွင်းရှိ ချင်းလက်နက်ကိုင်တပ်များဖြင့် ပူးပေါင်းပြီး စစ်ကောင်စီတပ်ကို တိုက်ခိုက်လျက်ရှိသည်။
