၃နာရီကျော်ကြာ တိုက်ပွဲပြင်းထန်ခဲ့ပြီး စစ်ကောင်စီတပ်မှ ထိခိုက်ကျဆုံးမှုရှိဟုဆို
ကရင်အမျိုးသားအစည်းအရုံး(KNU) တပ်မဟာ(၆)နယ်မြေ မြ၀တီ ဝေါ်လေလမ်း မြွေသုံးကောင် နှင့် သဲဖြူချောင်းဂိတ်အနီး နေရာတစ်ခု၌ တပ်စွဲထားသည့် စစ်ကောင်စီတပ်ကို ယနေ့နေ့လည်ပိုင်းက ဝင်ရောက်တိုက်ခိုက်ခဲ့ကြောင်း ကော်ဘရာစစ်ကြောင်းက သတင်းထုတ်ပြန်သည်။
စက်တင်ဘာ ၁၂ရက် နေ့လည် ၁၂နာရီခန့်မှစ၍ ၃နာရီခွဲအထိတိုက်ပွဲပြင်းထန်ခဲ့ပြီး စစ်ကောင်စီတပ်မှ ထိခိုက်ကျဆုံးရှိနိုင်ကြောင်း၊ အရေအတွက်အတိအကျ အတည်မပြုနိုင်သေးကြောင်း ဖော်ပြထားသည်။
စစ်ကောင်စီတပ်မှ လက်နက်ကြီးဖြင့် ပစ်ခတ်ခဲ့၍ ကော်ဘရာစစ်သည်တစ်ဦး ဒဏ်ရာရခဲ့ပြီး မစိုးရိမ်ရကြောင်း အသိပေးထားသည်။
ယနေ့တိုက်ပွဲ၌ ကော်ဘရာစစ်ကြောင်းမှူး ဗိုလ်ဒါဘောတိုက်ပွဲတွင် အနီးကပ်ကွပ်ကဲနေသည်ဟုလည်း ဓာတ်ပုံနှင့်တကွ ဖော်ပြသည်။
မြ၀တီ ဝေါ်လေလမ်းတွင် KNUဦးဆောင်သည့် ပူးပေါင်းတပ်ဖွဲ့ ကော်ဘရာစစ်ကြောင်းနှင့် စစ်ကောင်စီတပ်တို့ တိုက်ပွဲများ ဆက်တိုက်ဖြစ်ပွားလျက်ရှိပြီး စစ်ကောင်စီတပ်က အထိနာလျက်ရှိသည်။
