ကျေးရွာနှစ်ရွာက ဒေသခံပြည်သူပြည်သူလူထုတွေကို ရွာထဲကနေထွက်ခွာဖို့နဲ့ မထွက်ရင် ရွာကိုမီးရှို့ဖျက်ဆီးမယ်လို့ စစ်ကောင်စီတပ်က ခြိမ်းခြောက်ပြောဆိုခဲ့ကြောင်း ကေအဲန်ယူက သတင်းထုတ်ပြန်ပါတယ်။
စက်တင်ဘာ(၁၁)ရက်နေ့က ကေအဲန်ယူ – မူးမြို့နယ်စီမံအုပ်ချုပ်နယ်မြေအတွင်းရှိ တမာခေါနဲ့ တောင်စုကျေးရွာက ရပ်မိရပ်ဖတွေကို စစ်ကောင်စီတပ်က ဗိုလ်ကြီးအဆင့်ရှိသူ ဇေယျာလင်းက ခေါ်တွေ့ပြီး ကျေးရွာပြည်သူလူထုတွေကို ရွာထဲကနေထွက်ခွာဖို့ မထွက်ခွာပါက ရွာ၊ နေအိမ်တွေကို မီးရှို့ဖျက်ဆီးမယ်လို့ စစ်ကောင်စီတပ်က ခြိမ်းခြောက်ပြောဆိုခဲ့တာဖြစ်ပါတယ်။
![ရွာသားတွေကို ရွာထဲကနေထွက်ခွာကြဖို့နဲ့ မသွားရင်မီးရှို့မယ်လို့ စစ်တပ်ကခြိမ်းခြောက်ကြောင်း KNU ပြော](https://i0.wp.com/www.ludunwayoo.com/wp-content/uploads/2022/09/306028046_464705349052256_7066562587512482018_n.jpg?resize=576%2C1024&ssl=1)
စစ်ကောင်စီတပ်ရဲ့ခြိမ်းခြောက်မှုကြောင့် တမာခေါကျေးရွာက ဒေသခံပြည်သူလူထုတွေဟာ ကြောက်ရွံ့ထိတ်လန့်ပြီး စက်တင်ဘာ(၁၂)ရက်နေ့က ကျေးရွာကနေ ရွာလုံးကျွတ်ထွက်ခွာကာ စစ်တောင်းမြစ်အနောက်ဘက်ကမ်းရှိ နိုဘိုးခီးကျေးရွာနဲ့ အနီးအနားက ကျေးရွာတွေကို ရွှေ့ပြောင်းနေထိုင်ရတယ်လို့ ထုတ်ပြန်ချက်မှာပါရှိပါတယ်။
တမာခေါကျေးရွာမှာ အိမ်ခြေစုစုပေါင်း(၆၁)လုံးနဲ့ လူဦးရေ(၃၃၄)ဦး နေထိုင်ခဲ့တာဖြစ်ပါတယ်။
တောင်စုကျေးရွာမှာတော့ ကေအဲန်ယူ-မူးမြို့နယ်ရှိ တာဝန်ရှိခေါင်းဆောင်က စီမံထိန်းသိမ်းပြီး မိမိတို့ရဲ့ကျေးရွာထဲမှာသာ နေထိုင်စေတယ်လို့ ကေအဲန်ယူကဆိုပါတယ်။
![ရွာသားတွေကို ရွာထဲကနေထွက်ခွာကြဖို့နဲ့ မသွားရင်မီးရှို့မယ်လို့ စစ်တပ်ကခြိမ်းခြောက်ကြောင်း KNU ပြော](https://i0.wp.com/www.ludunwayoo.com/wp-content/uploads/2022/09/306004147_464705375718920_8790071264101917728_n.jpg?resize=576%2C1024&ssl=1)
ကေအဲန်ယူ-ခလယ်လွီထူခရိုင် မူးမြို့နယ်မှာ အာဏာသိမ်းမှုဖြစ်ပွားပြီးနောက်ပိုင်းကနေ စတင်ကာ ၂၀၂၂ ခုနှစ် ဇူလိုင်လအထိ စစ်ဘေးရှောင်နေရတဲ့ ကျေးရွာအုပ်စု(၁၇)စုက ကျေးရွာပေါင်း(၆၄)ရွာ၊ အိမ်ခြေပေါင်း(၂၁၁၆)လုံးနဲ့ လူဦးရေစုစုပေါင်း(၁၂၄၅၃)ဦးအထိ ရှိခဲ့တာဖြစ်ပြီး ဩဂုတ်လကနေ စက်တင်ဘာလ(၁၃) ရက်အတွင်း စစ်ဘေးရှောင်ဦးရ(၆၂၁၆)ဦး ထပ်တိုးများလာတယ်လို့ ထုတ်ပြန်ချက်အရသိရပါတယ်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)