မကွေးမြို့ရှိ ဒေါင်းနေအကျဥ်းထောင်တွင် ထောင်အာဏာပိုင်တွေက နိုင်ငံရေးအကျဉ်းသားများအပေါ် လူ့အခွင့်အရေးချိုးဖောက်မှုများ ကျူးလွန်နေကြောင်း အဆိုပါထောင်နှင့်နီးစပ်သူတစ်ဦးက ပြောသည်။
“မကွေးတိုင်း ဝန်ကြီးချုပ် ဒေါက်တာအောင်မိုးညိုရဲ့ PSO ဦးအောင်ဝင်းနဲ့ အတူ ရေနံချောင်း တက္ကသိုလ်ကျူတာဆရာ လူပေါင်း ၃၀လောက်ဟာ အခု တိုက်ပိက်ခံရတယ်။ သံခြေခြင်းတွေ ခတ်ပြီး ဒေါက်ထည့်ပြီး သူတို့ကို ထားတယ်။ ဒါ ပြီးခဲ့တဲ့ ၆ရက်နေ့လောက်က စပြီး ဖြစ်ခဲ့တဲ့ ဖြစ်စဉ်”ဟု ထောင်နှင့်နီးစပ်သူ တစ်ဦးက ပြောသည်။
ထိုသို့ လုပ်ဆောင်ခြင်းမှာ နိုင်ငံရေးအကျဉ်းသားများထံမှ ဒိုင်ယာရီစာရွက် တွေ့ရှိသည်ဟု အကြောင်းပြပြီး ၄၅ရက်ကြာ တိုက်ပိတ်သည့် ပြစ်ဒဏ် ချမှတ်ခဲ့ခြင်းဖြစ်သည်ဟု ဆိုသည်။
“ဒီလို လုပ်လိုက်ခြင်းအတွက် ရေချိုးရတာလည်း အဆင်မပြေဘူး။ အပေါ့အပါးအလေးသွားရတာလည်း အဆင်မပြေဘူး။ မကွေး ဒေါင်းနေထောင်ရဲ့ သုံးပွင့်အရာရှိတစ်ယောက်က နိုင်ငံရေးအကျဉ်းသားတွေအပေါ်မှာ အတော်လေးကို မိုက်မိုက်ရိုင်းရိုင်း ဆက်ဆံပြီးတော့ လူ့အခွင့်အရေးတွေ ချိုးဖောက်ပြီး နိုင့်ထက်ဆီးနင်း ပြုကျင့်နေတယ်ဆိုတာ ကြားရတယ်”ဟု ထောင်နှင့်နီးစပ်သူက ပြောသည်။
ဇွန်လ ၁၉ရက်ကလည်း ဒေါ်အောင်ဆန်းစုကြည် မွေးနေ့၌ ပန်းပန်သည်၊ သနပ်ခါးလိမ်းသည်ဟုဆိုကာ တစ်ညလုံး ခွေးလို အူခိုင်းခဲသည့် ဖြစ်စဉ်ရှိခဲ့ကြောင်း ၎င်းက ဆိုသည်။
“ ဒီလိုဖြစ်နေတာကို ICRCလိုအဖွဲ့တွေ AAPPလို နိုင်ငံရေးအကျဉ်းသားတွေ ကူညီထောက်ပံ့တဲ့ အဖွဲ့တွေက ဒီနိုင်ငံရေးအကျဉ်းသားတွေ အခွင့်အရေးဆုံးရှုံးနေတာ ချိုးဖောက်ခံနေရတာတွေ ကို ထဲထဲဝင်ဝင်သိရှိဖို့လိုတယ်” ဟု ထောင်နှင့်နီးစပ်သူက ပြောသည်။
ICRC အနေဖြင့် နိုင်ငံရေးအကျဉ်းသားများနှင့် တွေ့ဆုံပြီး အခက်အခဲများကို မေးမြန်းစေချင်ကြောင်းလည်း ၎င်းက ပြောကြားသည်။
