ရန်ကုန်မြို့ ကြည့်မြင်တိုင်မြို့နယ် ပန်းပင်နီလမ်း (ယခင်ပန်းပင်ကြီးလမ်း)တွင် စစ်ကောင်စီက အရပ်ဝတ်များဝတ်ဆင်ပြီး အိမ်စီးကားများဖြင့် ဆန္ဒပြလူငယ်များအား သေနတ်ပစ်ခတ်၍ အကြမ်းဖက်ဖမ်းဆီးရာ အနည်းဆုံး လူငယ် ၁၅ဦးအဆက်အသွယ် ပြတ်တောက်နေကြောင်း ရေဘဝဲ (ပြည်သူ့အကျိုးပြု လူငယ်အဖွဲ့အစည်း)က ယနေ့ ညပိုင်း ထုတ်ပြန်သည်။
ယနေ့ ညနေပိုင်းတွင် တော်လှန်လူငယ်များက ပန်းပင်နီလမ်း၌ လူထုတေးသံ သီချင်းသံပြိုင်သီဆို၍ “UN Prove Your Existence For Justice” စာသားကို ကိုင်ဆွဲကာ ပြည်သူ့သံအမတ် ဦးကျော်မိုးထွန်းသည် ပြည်သူ့အသံ၊ ပြည်သူ့အစိုးရ ကိုယ်စားပြုဖြစ် ကြောင်းနှင့် ပြည်သူ့သံအမတ်ကိုသာ ဆက်လက်အားပေးရပ်တည်ရန် UN ကိုတောင်းဆိုသည့် အကြမ်းမဖက်လှုပ်ရှားမှု ပြုလုပ်နေစဥ် စစ်ကောင်စီ၏ ဖမ်းဆီးခံရခြင်း ဖြစ်သည်။
![(ယမန်နှစ်က ကြည့်မြင်တိုင်မြို့နယ် ပန်းပင်ကြီးလမ်း၌ စစ်ကောင်စီက လူငယ်များအား ကားဖြင့်တိုက် အကြမ်းဖက် ဖမ်းဆီးခဲ့စဥ် ၊ပုံအဟောင်း အသုံးပြုထားသည်)](https://i0.wp.com/www.ludunwayoo.com/wp-content/uploads/2022/09/306282612_464986789024112_611788369734809948_n.jpg?resize=880%2C587&ssl=1)
အဆိုပါ အကြမ်းဖက် ဖမ်းဆီးခံရမှုဖြစ်စဥ်တွင် ရေဘဝဲ (ပြည်သူ့အကျိုးပြု လူငယ်အဖွဲ့အစည်း)၊ အခြေခံပညာကျောင်းသားလူငယ်များအစည်းအရုံး ၊ Myanmar Labour Alliance၊ ဗမာ့လူငယ်ကွန်ရက် ၊ ပညာနန်းတော်ကိုယ်ပိုင်ကျောင်းကျောင်းသားများသမဂ္ဂ ၊ Owl Community ၊ သတင်းထောက်များ အစရှိသောအဖွဲ့အစည်းအသီးသီးမှ အမျိုးသမီး၊ အမျိုးသား၊ LGBTQ နှင့် အသက်မပြည့်သေးသောလူငယ်များ စုစုပေါင်း ၁၅ဦးကျော် အဆက်အသွယ်ပြတ်တောက်လျက်ရှိကြောင်း ထုတ်ပြန်သည်။
ထိုသို့ ပစ်ခတ်ဖမ်းဆီးခံရပြီးနောက် မည်သည့်နေရာသို့ရောက်ရှိနေကြောင်းကို မသိရ၍ အဖွဲ့အစည်းအသီးသီးနှင့် မိသားစုဝင်များမှ အကြမ်းဖက်စစ်ကောင်စီတပ်၏ လူမဆန်သည့် ညှင်းပန်းနှိပ်ဆက်မှုများအပေါ် အသက်အန္တရာယ်ထိခိုက်မှုရှိမည်ကို အထူးစိုးရိမ်နေကြောင်း တော်လှန်ရေးအင်အားစုများက ဆိုသည်။
![(ယမန်နှစ်က ကြည့်မြင်တိုင်မြို့နယ် ပန်းပင်ကြီးလမ်း၌ စစ်ကောင်စီက လူငယ်များအား ကားဖြင့်တိုက် အကြမ်းဖက် ဖမ်းဆီးခဲ့စဥ် ၊ပုံအဟောင်း အသုံးပြုထားသည်)](https://i0.wp.com/www.ludunwayoo.com/wp-content/uploads/2022/09/306660925_464986725690785_4716039240555621756_n.jpg?resize=880%2C460&ssl=1)
“ညနေထဲက တော်တော်များများ အဆက်အသွယ် မရကြတော့ဘူး။ ဘယ်ကိုဖမ်းသွားလဲ ဆိုတာလည်း မကြားရဘူး။ အသက်အန္တရာယ် ဖြစ်မှာကို စိုးရိမ်နေကြတယ်။ လုံးဝ အဆက်အသွယ်ပြတ်နေလို့ လိုက်စုံစမ်းနေကြတုန်းပါပဲ”ဟု တော်လှန်ရေးအင်အားစုမှ လူငယ်တစ်ဦးက ပြောသည်။
ပန်းပင်နီလမ်း ဖမ်းဆီးခံရမှုတွင် ရန်ကုန်အရှေ့ပိုင်းတက္ကသိုလ်ကျောင်းသားများသမဂ္ဂ၏ ဗဟိုအလုပ် အမှုဆောင်အဖွဲ့ဝင် ကိုမင်းသူရိန် ပါဝင်ခဲ့ကြောင်း ကျောင်းသားများသမဂ္ဂကလည်း ယနေ့ ညပိုင်း၌ ထုတ်ပြန်သည်။
ကိုမင်းသူရိန်သည် ဖမ်းဆီးခံရပြီးနောက် မိခင်သမဂ္ဂနှင့် ယခုအချိန်အထိ အဆက်အသွယ်ပြတ် တောက်နေပြီး မည်သည့်နေရာသို့ရောက်ရှိနေကြောင်းကို စုံစမ်း၍ မရသေးကြောင်းလည်း ဖော်ပြထားသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)