CDM ကျောင်းဆရာတစ်ဦးအပါအဝင် အရပ်သားနှစ်ဦးလည်း သေဆုံးခဲ့ရ
စစ်ကိုင်းတိုင်း ကောလင်းမြို့နယ်တွင် စစ်ကောင် စီနှင့် တိုက်ပွဲ၌ လက်နက်အင်အားမမျှ၍ ပြည်သူ့ကာကွယ် ရေးရဲဘော် ရှစ်ဦးကျဆုံးပြီး CDM ကျောင်းဆရာတစ်ဦးအပါအဝင် အရပ်သားနှစ်ဦးလည်း သေဆုံးခဲ့သည်။
ကောလင်းမြို့နယ်၊ အင်ပင်သာကျေးရွာအနီးတွင် စက်တင်ဘာ ၁၂ရက် ညနေက တိုက်ပွဲအပြင်းအထန် ဖြစ်ခဲ့ပြီး စစ်ကောင်စီအထိနာခဲ့သလို ပြည်သူ့ကာကွယ်ရေးရဲဘော်များနှင့် ပြည်သူအချို့လည်းသေဆုံးခဲ့သည်ဟု ကောလင်းမြို့ခံများက ပြောသည်။
” ကျဆုံးတဲ့ ရှစ်ဦးက Local PDF တွေ။ CDM ကျောင်းဆရာ ကိုချမ်းသာနဲ့ လူငယ်တစ်ဦးကိုလည်း စခတွေက ဖမ်းသွားပြီး သတ်ပစ်လိုက်တယ်”ဟု ပြည်သူ့ကာကွယ်ရေးရဲဘော်တစ်ဦးကပြောသည်။
စစ်ကောင်စီစစ်ကြောင်းတွင် အင်အား ၁၀၀ခန့်ရှိပြီး ထိပ်တိုက်ရင်ဆိုင် တိုက်ပွဲသည် ၃နာရီခန့်အထိ ကြာခဲ့ကြောင်း၊ လက်နက်အင်အားမမျှ၍ ယခုကဲ့သို့ အကျအဆုံးများခဲ့ခြင်းဖြစ်ကြောင်း ပြည်သူ့ကာ ကွယ်ရေးရဲဘော်အချို့က ပြောသည်။
“စစ်ခွေးတွေလည်း သူတို့ လူတွေကို ထမ်းစင်တွေနဲ့ သယ်ထုတ်သွားကြတယ်။ သူတို့ ကိုးထောင်ဘို့ဖက်ကို ဆက်ထွက်သွားတယ်”ဟု ပြည်သူ့ကာကွယ်ရေးရဲဘော်တစ်ဦးက ပြောသည်။
ထို့အပြင် စစ်ကောင်စီစစ်ကြောင်း ရှိနေ၍ ဒေသခံများ အထူးသတိပြုနေထိုင်ကြရန် ကောလင်းဒေသတော်လှန်ရေးသတင်းများ ထုတ်ပြန်ပေးနေသည့် Kawlin Revolution – KR က သတိပေးထားသည်။
