‘နန်းထိုက်အောင်စစ်ဆင်ရေး’အဖြစ် ပြည်ခရိုင် PDF တပ်ရင်း (၃၆၀၁)၊ တပ်ခွဲ (၂)PPDF က ပေါင်းတည်မြို့နယ်ရှိ စစ်ကောင်စီခန့်အုပ်ချုပ်ရေးမှူးတစ်ဦးကို ပစ်ခတ်ရှင်းလင်းလိုက်ကြောင်း ယနေ့(စက်တင်ဘာ ၁၅) ထုတ်ပြန်သည်။
ယမန်နေ့ စက်တင်ဘာ ၁၄ ရက် ညနေ ၆ နာရီခွဲက ပေါင်းတည်မြို့နယ်၊ မှတ်တိုင်တိုက်နယ်၊ ရွာသစ်ကြီးအုပ်စု၊ ရှမ်းစပ်ရွာမှ စစ်ကောင်စီခန့်အုပ်ချုပ်ရေးမှူး ဦးဉာဏ်ဝင်းဆိုသူအား ၎င်း၏နေအိမ်တွင် သေနတ်ဖြင့် (၁၀)ချက် ပစ်ခတ်ရှင်းလင်းခဲ့ခြင်းဖြစ်ကြောင်း ဖော်ပြသည်။
ရွာသစ်ကြီးအုပ်ချုပ်ရေးမှူးသည် သာရေးနာရေးလုပ်မည်ဆိုလျှင် ပြည်သူများထံမှ ကျပ် ၃၀,၀၀၀၊ ထောက်ခံစာလုပ်လျှင် ကျပ် ၁၅,၀၀၀၊ ခရီးသွားထောက်ခံစာလုပ်လျှင် ကျပ် ၅,၀၀၀ ကောက်ခံနေလျှက်ရှိသည်ဟု ဆိုသည်။
ထို့အပြင် ယင်းအုပ်ချုပ်ရေးမှူးသည် PDF များကို နှိမ်နှင်းရန်ဟုဆိုကာ မြို့နယ်အုပ်ချုပ်ရေးမှူးထံမှ လက်နက်တောင်းခံခြင်းတို့အပြင် ရွာသူ၊ရွာသားများအား အမျိုးမျိုးဒုက္ခပေးနေသော စစ်ကောင်စီထောက်တိုင် တစ်ဦးဖြစ်လည်းဖြစ်ကြောင်း ဖော်ပြထားသည်။
ထို့ကြောင့် ပေါင်းတည်မြို့နယ်ပြည်သူ့ကာကွယ်ရေးတပ်ဖွဲ့(Paungde People Defense Force P-PDF) တပ်ရင်း(၃၆၀၁)တပ်ခွဲ (၂) မှ နန်းထိုက်အောင်စစ်ဆင်ရေးအဖြစ် သုတ်သင်ရှင်းလင်းလိုက်ခြင်းဟု ဆိုသည်။
